Оьрсийчоьнан Лакхарчу кхело шинариндийнахь луьстур ду чоьхьарчу гIуллакхийн министраллан Академехь доьшуш хиллачу Магомадов Анзоран арз. Шемарчу даIишхойх дIакхета гIортарна а, герз лелорна а бехкевинера иза Ростовн тIеман кхело.
КIентан гергарчара а, адвокаташа а чIагIдарца, герз кхоьсинера цунна полисхоша, ткъа кийтарло яйтинера жимчу стаге, тIехь Iазап латтош, ницкъбийр бу бохуш, кхерамаш тийсинчул тIаьхьа. Кхело набахтехь даккха 9 шо кхайкхийнера Магомадовна Зазадоккхучу-баттахь.
Масех шо хьалха Магомадов Анзоран ваша шен доьзал буьгуш Шема дIа а вахана, "Исламан пачхьалкх" шех олучу тобанхойх дIакхеттера. Мессенджерехула шен вешица хилла зIе ФСБ-но Анзор цунах дIакхета лаам болуш хилча санна тидинера аьлла, дийцина кIентан нанас Гендургуноева Маликас. Стохка гурахь Шемахь бомбанаш еттачу хенахь вийра Магомадов Адам.
Ростоврчу СИЗО-хь латтош ву карарчу хенахь Магомадов. Апелляци луьстур ю кхело шинаридийнахь. Тоьхна хан охьаяккхийта гIерта адвокаташ.
