ТIекхочийла долу линкаш

ЦIеххьана кхаьчна хаам!

Дакаев СаIидбек. Со-м дIавоьду, волий...


Дакаев СаIидбек
СО-М ДӀАВОЬДУ, ВОЛИЙ...

Гена араволуш,
«Марша гӀойла», – олуш,
БӀаьргийн шийла къежар,
ГӀийла тӀаьхьахьежар,
Деган кийра дулий,
Соьца новкъадолу…

Некъаш тегна генаш
Кхийзадаларх гена,
И хьан бӀаьрахьежар,
Дог ца догӀуш къежар,
Даго дуьхьал лоьцуш,
Ойланашца соьцу.

Сингаттамо Ӏуьйшуш,
Некъан болар луьйсуш,
Деган пенах тесна,
Хьоме амат эцна,
Синтем чомах болий,
Со-м дӀавоьду, волий.

Ойла кхерсташ герга,
Хьан марзонийн цӀергахь,
Даккхий синош дохуш,
Ваттавала, вогуш,
Марша Ӏойла – олий.
Со-м дӀавоьду, волий.

Нохчийн поэт, яздархо Дакаев СаьIидбек (65 шо).

Авторш

XS
SM
MD
LG