БуьритIерчу кафе чохь летта пхи жимстаг дIалаьцна полисхоша. Урсаца йинчу чевнашца ГIалгIайчуьра кхо вахархо дарбан хIусаме виллина. Къилба ХIирийчоьнан чоьхьарчу гIуллакхийн министралле хаам кхечира конфликтах тахана Iуьйранна 4 сахьт долучу хенахь дарбан цIийне лазийнарш кхачийначул тIаьхьа. ТАСС агенталло бина и хаам полицин декъарчу хьосташна тIе а тевжина.
Чоьхьарчу гIуллакхийн министраллан хаамашца, летаршкахь хиллачийн цIераш билгалъяхна полисхоша. Уьш бу 22-23 шераш долу кегийнах. Бехкзуламан гIуллакх а диллина, талла долийна хилла зулам.
ГIалгIайчоьнан къоман политикан министр Яндиев Муслим а, федералан инспектор Смирнов Виталий а кхаьчна БуьритIерчу дарбан цIийне лазийначарна тIехIотта.
Толлучу гIуллакхна тIехь терго латтош ю Къилба ХIирийчоьнан къаьмнийн юкъаметтигашкахула йолчу министраллан урхалхочо Цуциев Аслана а, ГIалгIайчоьнан куьйгалхочо Евкуров Юнус-Бека а.
