Адамийн бакъонаш ларъярна аьлла, Францин, Германин совгIат дина Соьлжа-ГIаларчу "Мемориалан" офисан куьйгалхочунна Титиев Аюбна.
2016-чу шарахь дуьйнна Францин, Германин арахьарчу гIуллакхийн министраллаша юкъадаьккхина и совгIат дIасадоькъу хIора шарахь шайн мехкашкахь адамийн бакъонаш хьалхаяьхна, уьш Iалашъеш схьабогIучу бакъонашларъярхошна, яздо "Мемориалан" пресс-гIуллакххоша.
Кху шарахь совгIатан лауреаташ дIакхайкхийна ишта Китайра а, Таиландера а, Африкера а, Камбоджера а, Ливанера а, Венесуэлера а, ишта кхечу пачхьалкхашкара а бакъонашларъярхой.
Церан могIарехь преми дала хьакъ хиларца билгалваьккхина Соьлжа-ГIаларчу "Меморилан" куьйгалхо Титиев Аюб.
Дечкен-баттахь дуьйна лаьцна латтош ву Титиев, наркотикаш яьхна цуьнгара аьлла, бехке а вина. Бакъонашларъярхочо ша а, цуьнан накъосташа а наркотикаш полисхоша цунна кхийсина лору. Цо бен болх бахьана долуш, политикан бух тIехь долийна хета царна Титиевна дуьхьал бехкзуламан гIуллакх.
