Нохчий а, гIезалой а Симферополехь летарх хаам Iорабаьккхина зорбанашкахь. Уьрсаш а, бейсболан гIожмаш а, кхиболу гIирсаш а лелийна цара латарехь. Летаршкахь лазийнарш а бу.
Кхаарин сарахь хилла ю и инцидент, яздо "ДС" хьостано, ATR телеканалан информацех пайда а оьцуш. "Зенаш дина шинна. Карарчу хенахь гIуллакх толлуш ду, бехкенаш дIа а лоьцуш", - аьлла, дийцина ГIирмерчу чоьхьарчу гIуллакхийн пресс-гIуллакххоша.
"Примечания" хьостано яздарехь, конфликт иккхина ГIирмерчу гIезалошна а, нохчашна а юкъахь. Уьрсан чевнаш йина цхьаъ дарбан цIийне кхачийна, дахарна кхерамечу хьолехь вац иза.
"Гарначук - нетолерантное" паблико Телеграм-каналехь яздо, латаршна бехке Думан депутат Бальбек Руслан ву бохуш.
"Бальбека а, цуьнан тобано а тховса буса урс хьаькхна ГIирмехь волчу Нохчийчоьнан векална а, цуьнан кIантана а, белхалочунна а. Кхоъ реанимацехь ву. Оцу хиллачунна тIехь урхалла деш вара Русланан ваша Крымбариев Тимур", -чIагIдо цо.
Сурсатех цхьана бизнесхочо дIацаделла ахча бахьана долуш иккхина ду и дов, дуьйцу цхьадолчу зорбанаша.
Бальбек Руслана цхьана а кепара комментари ца йитина цкъачунна хиллачух.
