Оьрсийчоьнан културан министро Мединский Владимира дIахьедар дина, тIейогIучу хенахь интернетах пайда эца паспорт оьшур ду аьлла. Иза цхьа а шеко йоцуш хир долуш хIума ду, билгалдаьккхина цо, хаам бо ТАСС агенталло. Мединскийс дийцарехь, интернет паспортца лелор Оьрсийчохь хилла ца Iаш дерриг а дуьнентIехь хир ду.
Цу кепара цо жоп делла, авторан кино йоккхучу наха шайн кхолларалла интернетехула яржорах ца кхоьру хьо, Iедалан фестивалашка дехарш а ца деш аьлла шега хаттар дича.
Мединскийс чIагIдарехь, Оьрсийчохь цензура яц, ткъа авторийн бакъо ю шайн кхоллараллах шайна товш дерг дан. Амма, цуьнца цхьаьна, министро билгалдаьккхина кинотеатрашкахь шайн филмаш гайта луучу нахана иза низамашца дан некъ болуш хилар.
