Веданан кIоштарчу Куьрчалара бахархошна керла хьалайинчу хIусамашкахь белхаш берзо ши кIира делла Нохчийчоьнан куьйгалхочо Кадыров Рамзана. Бюджетан организацийн белхахоша латкъамаш бина, балхара дIадохур ду бохуш, кхерамаш а туьйсуш, бертаза субботникашка ийзадо шаьш бохуш, яздо "Кавказский узел" агенталло.
Шайн хIусамаш меттахIиттаяр а дехна, тIаьхьа цига цIа а бирзина, баха дуьхьал хиллачу махкахошкара кху беттан 24-чохь бехк баьккхира Кадыровс. Доккхачу декъанна юьйцург яра Веданан кIоштара Куьрчала. Цо бахарехь, 56 хIусамах 39 цIа даьса ду цу эвлахь. Парламентан спикерна тIедиллира Кадыровс, я "дайина ахча юхадерзаде", я оцу хIусамашка нах бахийта аьлла.
Дахначу мукъаденошкахь Веданан кIоштарчу администрацино вовшахтуьйхира Куьрчалахь субботник. Цигахь дакъалецира администрацин а, кхечу меттигерчу бюджетан организацийн а белхахоша.
Шен цIе а хьулйина, цхьана хьукматан белхахочо дийцина "Кавказский узел" агенталле: "КIоштан префект а, цуьнан гIовсаш а цхьана бара субботникехь. Ас боху, сан хIун гIуллакх ду, шайн юьртда волчу декъа тIехь цIано ян, нехан хIусамашкара нехаш ара а йохуш. Соьга боху куьйгалхочо, кхунах гIадвахна ша а вац, амма лакхарчу хьаькамаша дина омра ду, цунна тIехволийла дац шен. Нагахь хьо реза вацахь, балхара дIавала".