ТIекхочийла долу линкаш

ЦIеххьана кхаьчна хаам!

Лаьцна латтон Iилманча кIелхьарваккхар тIедожийна Европан кхело


Iилманча Кудрявцев Виктор

Пачхьалкхна ямартхилла аьлла, Москварчу "Лефортово" олучу талламан изолятор чохь латтош волу Iилманча Кудрявцев Виктор катоххий могIарерчу бахархойн дарбан цIийне охьавилла аьлла, сацамбина Европан адамийн бакъонашкахула йолчу кхело (ЕСПЧ). Товбеца-баттахь дуьйна лаьцна ву 75 шо долу "Роскосмос" структуран белхахо.

Кудрявцевн интересаш Страсбургерчу кхелехь Iалашъечу адвокато Москаленко Каринас "МБХ-медиа" хьостане дийцарца, хьалхо цо бинчу латкъамна пIераскандийнахь жоп делла кхелахоша, Европан кхелан Регламентан 39-чу бакъонех пайда а эцна.

ЕСПЧ-н сацамца а догIуш, Оьрсийчоьнан Iедалша Кудрявцевна цунна оьшшу медицинан гIо кхачо деза: молханашца а, дарбан цIийне охьавилларца а, могушалла талларца а аьлла. КарабогIучу беттан 6-гIа де тIекхачале и дерриг а кхочушдина хила дезаш ду аьлла, билгалдаьккхина Страсбурган кхело шайн сацамна тIехь.

Оьрсийчоьнан омбудсмено Москаленко Татьянас дийцарехь, Европан кхело цхьа наггахь бен юкъаялош яц 39-гIа бакъо. Нагахь тутмакх валаран кхерамехь велахь а, кхерам лаьтташ хиларх кхачо йоллуш тоьшаллаш делахь а аьлла бакъонашларъярхочо. Зазадоккху-бутт бовш чуделлера ЕСПЧ-н кхеле Кузнецовн адвокато арз.

ТIера ца довлу лазарш токхуш ву 75 шо долу Iилманча, иштта бала хьоьгуш ву иза диабетца а. Цул совнах, инфаркт хилла а ву иза. Цуьнан адвокаташа масийттазза дIахьедира, бехкевечу Кузнецовна оьшу медикаменташ ца кхачайо, йа лоьраш цунна тIебуьтуш а бац бохуш.

Машенаш ен Юккъерчу Iилман, талламан институтан (ЦНИИ) белхахо Кудрявцев Виктор лаьцна стохка Товбеца-беттан 20-чохь. Iилманча бехкево, "Авангард", "Кинжал" олучу комплексийн гиперзвукан технологех къайлах информаци Бельгин институте дIакхачорна. Кудрявцевн адвокаташа чIагIдо, оьрсийн институт официалехь юкъарлонаш лелош хилла Бельгин доьшийлаца, юкъаметтигийн программа Оьрсийчоьнан Iедалхошца йийцарейина а яра, оцу агIор мел бен белхаш биллина дIахьош а бара бохуш.

Ишта бехк шена тIе ца лоцу Iилманчас а. Талламчашца цхьана болх бан дуьхьал хилира Кудрявцев дахначу шеран Лахьан-баттахь. Цо бахарехь, бехк тIе а лаций, белхан накъостий юкъаозабе аьллера цуьнга, реза хилахь изоляторчуьра ара а ваьккхина, цIахь дIасавалар а дихкина, вуьтур ву аьлла.

Стигалкъекъа-беттан 20-чу кхаччалц Iилманча чохь вуьтуш хан дIаяхъйина кхелахоша.

XS
SM
MD
LG