Аджарин премьер-министро Рижвадзе Торникес даржера йохийна регионерчу дешаран, културан, спортан министр Шамилишвили Инга. Дийцарехь, бахьана ду - Гуьржийчоьнан йозуш цахилар даздечу дийнахь Оьрсийчуьра еанчу берийн ансамбло Батумин урамех чекхбийлар "Оьрсийчоь, Оьрсийчоь" бохуш, маьхьарий а детташ. ТАСС агенталло бина и хаам.
"Таханалерачу денца суна вай массо а декъалдан лаьа, уггар а хьалха. Кху дийне кхача гIерташ вайн дайша къийсам латтийна, делахь а, вайн йозуш цахиларе къийсам тахана а дIахьош бу вай. Урамехь хиллачух аьлча, ах жоьпалла Аджарин дешаран министраллана тIехь ду, цундела иза даржах мукъаяьккхина", - аьлла, дIахьедина Рижвадзес.
Масийтта шо а ду Батумехь, Аджарин дешаран министраллан инициативаца, дуьненаюкъара фолклоран фестивал дIахьош йолу. Кху шарахь дуьххьара дакъалоцуш хиллера оцу фестивалехь Оьрсийчоьнан Ростов гIаларчу берийн ансамбло. Дешаран министралло кхайкхина баьхкина а хилла уьш.
Гуьржийчоьнан йозуш цахиларан де – къоман дезде ду. ХIора шарахь Стигалкъекъа-беттан 26-чохь билгалдоккху и. 1918-чу шарахь Оьрсийчоьнан империн декъара араяьллачул тIаьхьа дIакхайкхира иза Гуьржийн Демократин Республика аьлла.
