Оьрсийчоьнан културан гIуллакхдархошна кхераме ду аьлла Кремло Гуьржийчу баха. "Вайн артисташ кхеташ хила беза, цкъачунна Гуьржийчу баха кхераме хиларх", - аьлла журналисташка Оьрсийчоьнан президентан пресс-секретаро Песков Дмитрийс.
"Гуьржийчоьнан векалшкара вайна хезна ма дац, парламент чу а лилхина, кхечу пачхьалкхан (Оьрсийчоьнан) халкъан депутаташна тIелата гIертар емалдар. Цара лелийначунна критика еш цхьа дош хезна дац вайна", - аьлла, кхетийна Песковс.
Байначу беттан 20-чохь оппозицица цхьана Гуьржийчоьнан парламентан гIишло чу баха гIоьртинера масех эзар демонстрантхой, спикере Кобахидзе Ираклига дарж охьадиллийтар тIе а дожош. БIаьргаш Iовжон газ а хецна, резинан даьндаргаш етташ, полицино дIайохийнера митинг. БIеннашкахь митинге бевллачарна чевнаш йинера, резинан хIоъно бIаьрг баьккхинера цхьана зудчун. Кобахидзес дарж дитира, амма хIетте а Тбилисехь чIагIйира полисхошна дуьхьал протесташ. Бахархоша дарж охьадиллар тIедожийна чоьхьарчу гIуллакхийн министрна Гахария Георгийна.
Вовшахтасадаларан бахьана хилира пачхьалкхан Думан депутато Гаврилов Сергейс а, кхечу Оьрсийчоьнан делегаташа а Тбилисехь йоьдучу парламентийн ортодоксан инарла ассамблейн сессехь дакъалацарца иккхина скандал бахьана долуш. Оппозицин депутаташ эргIадбаханера, оьрсийн коллегас кхеташо парламентан куьйгалхочун меттиг дIа а лаьцна, дIаяьхьна хиларца.
