Зорба тоха
Гуьржийчоьнан арахьарчу гIуллакхийн министралло резадацар хьажийна Оьрсийчу цуьнан дозанхоша а, Къилба ХIирийчоьнан пачхьалкхан кхерамзаллин комитетан векалша а автономи лаьттинчу мехкан административан дозанна гергарчу гуьржийн ярташкара 8 вахархо дIалацарна.
Шида Картли регионан администрацино (Къилба ХIирийчоьнца доза долу гуьржийн кIошт) хаамбина, хIирашна уллерчу лома тIе, килсе ваха хьалаваьлча, лаьцна ворхI вахархо, ткъа цхьаъ – шен юьрта йистехь аренан белхаш беш, аьлла.
"Тхо саготта ду оккупацин ницкъаша Шида Картли махкарчу оккупацин дозанехь нах лечкъорна», - дIахьедина гуьржийн дипломатин хьукматан спикеро Константиниди Владимира.
Цо бахарехь, «оккупацин дозанехь питанаш тийсар, девнаш дахар алсамдаларо талхайо кхерамзалла». Низам а дохош Гуьржийчоьнан бахархой лечкъорца, лецарца юкъаметтигаш талхош лаьтта, билгалдоккху Константидис.
Къилба ХIирийчоь Оьрсийчоьно оккупаце лаьцна шен мохк лору Гуьржийчоьно.
Дукха хан йоццуш дирзина Гуьржийчохь Agile Spirit – 20I9 цIе йолу тIемаIамораш. Уьш дIадаьхьина Атлантикан альянсо (НАТО) дакъа а лоцуш. Iамораш доьрзуш гуьржийн тIеман министро Изория Левана хаамбира, пачхьалкхо шен тIеман турс чIагIдеш, кхаа шарна тIеман программа хIоттош ю Iамеркахошца цхьаьна, аьлла. И хаам баьржинчул тIаьхьа леца болийна Къилба ХIирийчоьнан дозанехь могIара гуьржий.
