Хасаров ШаIрани
Ширделла тIулгаш
Цкъа пхьеха лаьттинчохь тап аьлла, тийна,
Тидамза Iуьллуш ду ширделла тIулгаш.
Ехий и кIай мажош яц хIинца дийна,
Хиллачийн когашка хиндерниг гулдан.
Воьдучу жимхас уьш ца леци бIаьрга.
Хьажа а ца сеци маршалла хатта.
Аз доцчу маьхьарца, кхайкхинчохь цаьрга,
Шайн маракъевлина тIулгаша латта.
Шардеш син лекхий сатийсамийн гунаш,
Царна ша диннарг ди дуьнено суна.
Текхош шен къахьонаш, марзонаш, хьунаш
Некъаш а дехки цо сан дагчухула.
Цу тIулгийн дуккха а хир дара дийца,
Дахаран йовха цIе юха шайх летча.
Вайн дуьне ас царна герга озийра,
ДIа а и хийцира, саца ца делла.
Цуьнан а хир ду-кх сатийсамийн гунаш,
ХIинца а кхачаза ирхенаш, лаьмнаш,
Ас хьеярх сайн дагалецамийн гIунаш,
Ас дийша ца дитарх дийшина аьзнаш?!
1978-шо