ТIекхочийла долу линкаш

ЦIеххьана кхаьчна хаам!

Хасаров ШаIрани. Ца дина зулмаш тIетоьттуш...


please wait

No media source currently available

0:00 0:00:46 0:00
Линкана тIе

Хасаров ШаIрани

***

Ца дина зулмаш тIетоьттуш,
Юьртахь гIагI-машенаш хоьхкуш.
Дахар я Iожалла кхийдош,
Пал туьйсу доьдучу дийно.

ДIогахь – ор, башха хIоъ кхетта,
Кхузахь - цIий бацалахь детта,
Шен цIера дIа а вадийна,
Декъаза маьрша стаг вийна.

ЦIийбелла, регIаца керчаш,
Дашо малх дIабуза гIерта.
Яссийна йитинчу кертахь
Йоьлхуш цхьа нана ю кIентан.

Кханене кхийдачу неха
Бохуш и синтемаш гена,
Лаьтта и лестадеш деза,
Ломахь бен тIом а схьахеза.

Ца йина ойланаш йойту,
Хиндолчух хилларг а гойту,
И сан са дахаре ийзон,
Сох эхь ца хетачу дийно.
2001 шо

Хасаров Темуркъин ШаIрани вина Казахстанехь Кзыл-Ордан мехкан Терень -Узецки кIоштарчу Кокжиде юьртахь 1953-чу шеран 22-чу октябрехь.

Цо дешна Нохчийчохь ша вехачу Дишни-Веданарчу юьртан школехь. Цул тIаьхьа агрономан говзалла караерзош 1972--чу шарахь чекхъяьккхина Серноводскера юьртабахаман техникум, ткъа 1982-чу шарахь чекхъяьккхина хIинца Владикавказ олучу гIалахь хилла Ламанхойн юьртабахаман институт. 1972-1974-чу а шерашкахь гIуллакх дина Советан эскарехь.

Тайп-тайпана белхаш бина комсомолехь, "Колхозан дахар " Веданан кIоштан газетан редакцехь, юьртабахаман декъехь, КПСС-н Веданан райкомехь.

Дахаран доккха дакъа дIаделла хьехархочун балхана - дерриге а 25 шо, цуьнах 20 шо дIадахана юьртарчу школехь берашна хими а, биологи а хьоьхуш.

Кхоллараллин некъ дIаболийна 1971-чу шарахь. 1986 чу шарахь «Сатасаран сахьт» байтанчийн гуларехь стихийн цикл араяьлла.

1991-чу шарахь араяьккхина "Дашон хьоза" цIе йолу берийн стихийн гулар. Ехха зIе латтийна берийн "СтелаIад" журналца, баккхийчеран стихаш араевлла нохчийн журналашкахь а, газеташкахь а.

2010-чу шарахь дуьйна Оьрсийчоьнан яздархойн бертан декъашхо ву, 2011 чу шарахь "Республикан хьакъволу журналист" цIе тиллина поэтана.

Веданарчу "Керла дахар" газетехь корреспондентан цIарах болх бина цо.

Хасаров ШаIрани кхелхина 2020-чу шеран Зазадоккху-беттан (март) 22-чу дийнахь.

Оха хьоьхург

XS
SM
MD
LG