Хасаров ШаIрани
Волла
с духарш ца лоьху хьулъеш сайн волла.
Со воллех уьдуш ву, сайн ка ма доллу.
Дахаран берам чу цо сискал аьтта.
И тIеттIа юзуш ю. И чIагIлуш лаьтта.
Ча гушшехь, цу ченан лар леха даьлла.
Дуьне а хьаьвзина, цуьнах ун даьлла.
Адамийн гIилкхаш а текхаргех сетта,
Довхачу дегнашна шийла Iаь етташ.
Дуьнена-м йиш яра шен некъаш шардан?!
Дуьненехь-м хир дара шен унна дарба?!
Духаршца гIоьртинарг хьулъян шен волла,
Дахаран бакъдерниг шех кхардон воллу.
2012 шо
Хасаров Темуркъин ШаIрани вина Казахстанехь Кзыл-Ордан мехкан Терень -Узецки кIоштарчу Кокжиде юьртахь 1953-чу шеран 22-чу октябрехь.
Цо дешна Нохчийчохь ша вехачу Дишни-Веданарчу юьртан школехь. Цул тIаьхьа агрономан говзалла караерзош 1972--чу шарахь чекхъяьккхина Серноводскера юьртабахаман техникум, ткъа 1982-чу шарахь чекхъяьккхина хIинца Владикавказ олучу гIалахь хилла Ламанхойн юьртабахаман институт. 1972-1974-чу а шерашкахь гIуллакх дина Советан эскарехь.
Тайп-тайпана белхаш бина комсомолехь, "Колхозан дахар " Веданан кIоштан газетан редакцехь, юьртабахаман декъехь, КПСС-н Веданан райкомехь.
Дахаран доккха дакъа дIаделла хьехархочун балхана - дерриге а 25 шо, цуьнах 20 шо дIадахана юьртарчу школехь берашна хими а, биологи а хьоьхуш.
Кхоллараллин некъ дIаболийна 1971-чу шарахь. 1986 чу шарахь «Сатасаран сахьт» байтанчийн гуларехь стихийн цикл араяьлла.
1991-чу шарахь араяьккхина "Дашон хьоза" цIе йолу берийн стихийн гулар. Ехха зIе латтийна берийн "СтелаIад" журналца, баккхийчеран стихаш араевлла нохчийн журналашкахь а, газеташкахь а.
2010-чу шарахь дуьйна Оьрсийчоьнан яздархойн бертан декъашхо ву, 2011 чу шарахь "Республикан хьакъволу журналист" цIе тиллина поэтана.
Веданарчу "Керла дахар" газетехь корреспондентан цIарах болх бина цо.
Хасаров ШаIрани кхелхина 2020-чу шеран Зазадоккху-беттан (март) 22-чу дийнахь.
