2019-чу шарахь хьалхарчу 7 баттахь Британехь еш йолу Rolls-Royce люкс классан машенаш эцна регионаш билгалъяьхна Оьрсийчохь. Цунах лаьцна хаам бо "Автостат" талламан агенталло.
Уггар дукха Rolls-Royce-ш йоьхкина Москох (50) а, Москохан кIоштахь (11) а. Петарбухехь уьш эцна 10.
Rolls-Royce-ан 4 модель эцна Краснодаран махкахь, 3 -- Свердловн кIоштахь. Цу тайпа шишша машен эцна Приморьехь а, ГIезалойчохь а, Нохчийчохь а. Цхьацца Rolls-Royce йоьхкина кхин а Оьрсийчоьнан 10 регионехь.
Уггар дукха эцнарг ю царна юкъахь 26 миллион соьмана тIера мах болалуш йолу Rolls-Royce Cullinan.
Ерриг а Оьрсийчохь кхушеран хьалхарчу 7 баттахь йоьхкина 95 Rolls-Royce. И терахь 92% алсам ду стохка хиллачуьнца дуьстича.
