ГIалгIайчохь дейишас къизаллица йиттина, дарбан хIусаме кхачийначу Ажигова Iайшин ши ваша школе дIа ца эцна, церан нана даимна а цхьанхьа ехаш ю аьлла, дIаязйина ца хиларна аьлла, хааме даьккхина кхиазхойн гIуллакхашкахула йолчу хьукматан куьйгалхочо. Ша йоI Москварчу профессоран Рошаль Леонидан клиникехь Iуьллуш ю, масех пластикан операци а ю цунна ян езаш аьлла лоьраша.
"Тхайн цIенна гергарчу школе вахийта хьаьжнера со ши кIант. Директор цкъа реза хилира, юха цуьнан гIовса меттиг бац элира. Сайн боцчу аьттонца, хала кечвинера ас и шиъ школе вахийта", - аьлла берийн нанас Евлоева Лидас "Кавказ.Реалии" портале.
Цо дийцарехь, заьIапхо ю аьлла, шена догIучу пенси тIехь а, йоIана йиттинчул тIаьхьа саготта болчу наха лучу ахчанца а хан йоккхуш бу уьш.
Несарарчу кхиазхойн гIуллакхашна тIехь Iуналла латточу хьукматан куьйгалхочо Могушкова Лайлаа бахарехь, даимна а цхьанхьа ехаш ю аьлла, дIаязйина ца хиларна дуьхьало йина школехь цунна.
"Ас телефон тоьхнера школе, директоро цкъачунна меттиг бац элира соьга, карабогIучу баттахь цхьаъ дан хьожур ю ша аьлла. Цхьанхьа а дIабазбина бац уьш, йа нана а, йа цуьнан бераш а. Оцу юьртахь цхьанхьа дIаязъяйта администраци а гIой аьлла, хьехна оха цунна", - аьлла Могушковас.