Нохчийчохь, Дагестанехь, Краснодар-махкахь хийцабелла юкъараллера тергамбархой

43 махкахь карлаяьхна шайн системера комиссеш, хаамбина Оьрсийчоьнан Юкъараллерчу тергамбархойн комиссино. Цо бахарехь, халкъан тидам тIехь лаьтта тергамбархойн комиссешна – шишша стаг хилла мехкашкарчу конкурсашкахь церан декъахь хила лууш.

Юьйцучу 43 мехкан комиссешка чекхваьлла 700 стаг, карлаяьхна комиссеш Нохчийчохь, Дагестанехь, Краснодар-махкахь. ХIора комиссин декъашхойн терахь ду 5-нна тIера 40 стаге кхочуш.

Мехкашкара кандидаташ тIечIагIбина Оьрсийчоьнан Юкъараллерчу тергамбархойн комиссехь. Керла нах бу декъашхошлахь бакъоларъяран цхьаьнакхетараллийн а, прессин а векалш.

"Тхан ши белхахо вара тхуна Дагестанан Юкъараллерчу тергамбархойн комисси юкъа вахийта лууш, кандидаташла язвелла – Аламов Мохьмад а, Янгулбаев Абубакар а. Цхьа а ца ваьлла царех чекх", - элира "Кавказ.Реалии" "Iазапна дуьхьалояран комитатан" Къилбаседа Кавказерчу офисан куьйгалхочо Пискунов Дмитрийс.

"Нохчийчохь-м тхо гIорта а ца гIоьртира, цигахь тхуна ца карийра тхан стаг кандидаташка ваккха яьхьаш организаци", - билгалдаьккхира бакъоларъярхочо.

Пискуновс бахарехь, цуьнан юкъаралла дуккхаза а гIиртина регионерчу тергамбархойн комиссешца гергарло таса, амма дан ца делла иза.

10 декъашхо ву Дагестанан юкъараллерчу тергамбархойн комиссехь, царалахь ю журналист Гаджиева Зульфия а. 7 стаг ву Нохчийчуьрчу комиссехь.

Краснодарерчу комиссе кхаьчна меттигерчу "Iазапна духьалояран комитетан" декъан белхахо Коцарева Анна, хаамбира "Кавказ.Реалиига" цуьнан куьйгалхочо Романов Сергейс.

Цо бахарехь, Краснодарера "Iазапна духьалояран комитетан" офис а гIиртина мехкан юкъараллерчу тергамбархойн кхеташонца зIе таса, амма аьтто ца баьлла хIинццалц схьа.