ТIекхочийла долу линкаш

ЦIеххьана кхаьчна хаам!

Яралиев Юсуп. Седарчийн буьйсанна


Яралиев Юсуп

Седарчийн буьйсанна

ЛадогӀал, хӀай накъост, ойлае вайша,
Д1о стиглахь богучу седано санна.
Нур делош, хьоьжу и кху лаьтта вайга,
Шен йиш хиларна, хӀай, шен йиш хиларна.
ЛадогӀа ахь, накъост, ойла ер вайша...
Стиглара и седа-м шен стиглахь лепа.
Кху лаьттан седарчий дац тӀаккха вай а?
Кху лаьттахь ма ду вай. Ткъа вай ца лепа…
ЛадогӀа ахь, накъост, ойла ей вайша
Цу стиглахь догучу седарчийн нуьрца.
Йина хир и ойла вайн ворхӀе дайша
Шайн цхьацца седанца,
яхьбуьйлуш цуьнца.
ХӀораннан дахарехь шен некъ чулоцуш,
Сатийсам-седарчий хилла хир церан.
Цхьаъа а ма вац вайх цхьа седа боцуш.
Вуй тӀаккха? Вац, накъост,
вац, накъост, дера.
Хьажахьа, дӀо мархаш хьийзина хир ю,
Седарчийн дашо нур дӀахьулдан гӀерташ.
И сурт гуш, дайша а дина ма хир ду,
Шайн хене хьаьжжина
шайн цхьацца хеттарш.
Цкъа баьхна хир цара, ойлане оьгуш:
«Вай стенна деха, хӀай, вай хӀунда деха?»
ТӀаккха цу ойлано хилла хир хьоьхуш:
«Седанах ваьхначун дахар ду деха».
Ойлае ахь, накъост, ойла ер вайша,
Ойлано вайшинна цхьаъ хьоьхур дац-те?
Хьежа хьо седане. И седа байча,
Хьожур ву вайша кху лахарчу лаьтте.
Ойла ер вайшимма сахиллалц тховса,
Ойла ер адамийн, ойла ер лаьттан,
Хан кхаьчна вай вешан дегнашка хьовса:
Малхаца яхьдуьйлуш, даха вай лаьттахь!

Яралиев Юсуп вина 1955-чу шеран Стигалкъекъа-беттан 1-чу дийнахь Казахстанехь. 1957-чу шарахь депортацера шайн даймахка юхадогIучу къомаца дайн Хорача олучу эвла вирзина. 1973-чу шарахь Веданара лоьмар I йолу школа чекхъяьккхинчул тIаьхьа Соьлжа-ГIаларчу университетехь дешна Яралиев Юсупа. Байташ язъян волавелла 5-чу классехь дуьйнна. Нохчийн университетехь кхоллаеллачу «Пхьармат» цIе йолчу литературан цхьаьнакхетараллин декъашхо а вара Юсуп.

Поэт хилла ца Iаш, Яралиев Юсуп меттан говзанча, историк, журналист ву. Дуккхаъ шерашкахь къахьегна цо школехь, кеп-кепарчу зорбанашкахь, телевизионехь а. Цуьнан стихаш зорбане йийлина журналаштIехь, газеташтIехь,тайп-тайпанчу гуларшкахь. Ишта Яраливс ша арахецна «Шовданан йистехь суьйре» цIе йолу шен байтийн киншка. Яралиевн дешнаштIехь кхолладелла дуккха а иллеш а, эшарш а ду.

XS
SM
MD
LG