Нохчийчоьнан куьйгалхочун Гергарчу Малхбалехь векал лаьттинчу, Федерацин Кхеташонан дуьненаюкъарчу гIуллакхашкахула йолчу комитетан куьйгалхочун гIовса Сабсаби Зияда шегара дарж охьадиллина. "Кегийчарна некъ бала воллу со", - аьлла цо ТАСС агенталле шинаридийнахь, ша Нохчийчоьнан куьйгалхочун Кадыров Рамзанан командехь вуьсуш хилар билгалдоккхуш.
"Кхечарна, къаьсттина кегийчарна некъ бала а, болх бан таро яла а хан кхаьчна. Цхьана даржехь къахьега 11 шо дукха хан ю", - аьлла Сабсабис. Жимма са а даьIна, цул тIаьхьа балха хIуттур ву ша аьлла цо.
"Со хила а хилла, кхин дIа а хир ву Кадыровн командехь. Ша къоман лидерца – Оьрсийчоьнан президентца а, мехкан куьйгалхочуьнца а ву аьлла мел хетачо, ша миччахь велахь а, муьлххачу даржехь хилча а шен ницкъ мел кхочург дан деза. Со мел оьшу, сайн тароне хьаьжжина даим а гIоьнна кийча хир ву со", - билгалдаьккхина сенаторо.
ТIаьххьарчу итт шерашкахь ша дIатийсинчу зIенех "Оьрсийчоь а, цуьнан регионаш а Гергарчу Малхбалехь а, доллу дуьненахь а кхиорхьама пайдаэца беза" аьлла хета цунна.
2008-чу шарера схьа дуьйна Нохчийчоьнан цIарах сенатор вара Сабсаби. Ткъа 2009-чу шарахь Федерацин Кхеташонан комитетан куьйгалхочун гIовс хаьржинера иза. 2021-чу шеран Гезгмашин-баттахь сенаторан декхарш кхочушден хан чекхйолуш яра цуьнан. Федерацин Кхеташонехь луьстур долуш ду цуьнан дIахьедар кхааридийнахь.
