Францино тховкIело еллачу Нохчийчуьрчу вахархочунна Турчаев Хасанбекна 10 шо хан тоьхна набахтехь яккха Парижерчу леринчу бехккъасторхойн кхело. AFP агенталлан информацица, Шемара тIемалой кечбеш хилла аьлла, бехкала хьарчийна иза. 2013-2014-чу а шерийн кхаа баттахь ша Шемахь хилла аьлла, кхелехь бехк тIелаьцна Турчаевс. Амма цо тIе ца дуьту, ша даIишхойх дIа а кхетта, тIом бан вахана хилар. Шен вежарий лаха Iалашонца кхаьчнера ша бохуш, чIагIдо цо.
Ткъа талламчаша шайгахь тоьшаллаш ду боху, тIамехь хиларал а совнах, лоьлхуьйтурш лело цо тIемалой Iамош хиларан а, цхьахйолчу "Ахрар аш-Шам" тобана юкъадогIучу гаран "эмир" иза лаьттина хиларх а.
2002-чу шарахь Франци веана хиллачу Турчаевна меттигерчу Iедало политикан тховкIело а елла хилла. 2005-чу шарахь дуьйна пачхьалкхан къайлахчу сервисаша шайн тергонехь латтош хилла ву иза, цуьнан радикалан хьежамаш бахьана долуш.
Страсбургера дIавахна хилла Турчаев Шема, цигахь шен хIусамнана а, доьзал а битина. Цул тIаьхьа Молдавехь дIалаьцначу цунна экстрадици йина хиллера Франци.
