"Нохчийн поэзин де" хир ду Хабаровскехь тIедогIучу шотдийнахь 1894 шарахь кхоьллина йолчу Генарчу Малхбален пачхьалкхан Iилманан библиотекехь, хаам бо меттигерчу зорбан гIирсаша. Иза вовшахтухуш ю "Хабаровн мехкан халкъийн ассамблеян" дакъа долу Хабаровн регионан нохчийн юкъараллин вовшахтохар "Башлам".
"Нохчийн поэзин де" дIахьош кечбина "Нохчийн литературан классикаш" а, "Соьлж-ГIала селхана а, тахана а" книгийн а, суртийн а гайтамаш. Хьажархошна гойтур ю литературан-мукъамийн композици. СовгIаташ а луш, дIахьура ю нохчийн литературах лаьцна викторина а.
