ТIекхочийла долу линкаш

ЦIеххьана кхаьчна хаам!

ЦIерпошт – шапсугийн эвлашкахула


Хутова Заира

Оьрсийчоьнан президента Путин Владимира, ша Къилбаседа Кавказе веъча, билгалъяккхира «стратегин Iалашо», Сочина гергара, Iаьржачу хIордан йистонца Iуьллучуьра дIа а баьккхина, чоьхьа оза беза аьчкан некъ, аьлла. Президента аьлларг кхочушдахь, керла некъ хир бу чергазех болчу шапсугийн ярташкахула чекхболуш – ткъа оцо зен дийр ду ишта а жимма бен дисина доцчу къомана, боху юкъархоша.

Сочера хьаькамаш вуно реза бу Путина аьллачунна – лаьа царна ма-хуьллу сиха некъ шаьш долучуьра дехьабоккхийла. Цара бахарехь, керлачу ачка некъо шорйийр ю туризм, лахйийр ю Соче кхача, йийбар чуйохьуш ен харж, бацбийр бу хIорда тIе лелачу нехан некъ.

Шапсугийн жигархо Гвашев Руслан дуккхаза а гIиртина шен жима даймохк индустрин чалхашка хIаллак ца байта. Амма ца хеза цуьнан леткъамаш Сочерчу Iедална – маьIна доцу сингаттам бу цо балхориг, аьлла цуьнга.

"Некъан проект тIеэцна яьлла, ахча а къастийна цунна. Тхан, Краснодар махкахь, Iаьржа хIорда йистехь эзарнаш шерашкахь даьхначу къоман, цхьа статус хилча-м дика дара, амма бац тхан хиндолчух теша бух. Некъан аса билгалйоккхуш а, я иза толлуш а вац тхох комиссе кхайкхина стагга а. Ткъа мел дукха ю некъан асано хIаллаъйийр йолу историн, археологин хазанаш! – яздина Руслана шен Фейсбук-агIонтIехь байначу баттахь.

Шапсугийн ярташ хIаллакйийр ю некъо, боху Адыгейрчу жигархочо, «Адыгэ Хасэ» юкъараллин декъашхочо Негуч Шамсудина а.

"Со цецвала хIума дисина а дац. РогIехь ахчанах катухуш бу, оцо даима а санна экологина, хьадан магийна доцчу латтанашна эшам бо. Оьрсийчохь оьшшучул ахча п дойий, чекх ца доккху хIумма а – катуху ахча алссам хьулу. Дагалоцур вай Сочера олимпиада, дуьненаюкъара футболан чемпионат, ГIирме тиллина тIай, «Малхбале» космодром, Сколково, дуккха а кхийолу проекташ, цара хьалакхаьллина ахча дара оьшучул дуккха а дукха. Ткъа некъо шапсугаш дакъазбохур бу, лохкур бу уьш шайн ярташкара», - дийцира Негуча «Кавказ.Реалиига».

Стенна ца дина некъах дерг шапсугашца дийцаре? Оцу хаттарца долийра «Кавказ.Реалиица» шен къамел ГIебарта-Балкхаройчоьнан парламентан депутат лаьттинчу Тумов Мухьамеддина.

"Сагатдойту, вас йойту Оьрсийчоьно, бIе шо сов хан яьлча а (Кавказан тIом бирзина – ред.) адыгаш Къилбаседа Кавказан автохтонан халкъ хиларх даре ца деш. Стенна до Оьрсийчоьно дерриг а адыгашна дуьхьал? Шеко а йоцуш ду кхераме шапсугашна и некъ шайн ярташкахула биллар. Церан ярташ а йохош, бахархой гIаланашкахь санна долчу тIекIелдинчу цIеношка дIасабохур бу Iедало», - леткъа Тумов.

Кестта Iорайоккхур ю шапсугийн ярташкахула чекхболучу аьчка некъан проект, элира Краснодар-мехкан "Адыгэ Хасэн" куьйгалхочо Сохт Аскера. «ТIаккха хуур ду, муха, муьлхачу меттигашкахула дIабуьгур бу и некъ. Цкъачунна хууш дац цунах дерг», - билгалдаьккхира юкъархочо.

Сохта дийцарехь, итт эзар шапсуг веха Сочина чуйогIучу Туапсен а, Лазаревскийн а кIошташкахь, цундела цуьнан шеко яц некъо церан хIусамаш хьайийриг хиларх.

Комментареш

New Comments Available

Москвара даймахка балийначу кегийрхошкара бехкаш даьхна нохчийн Iедалхоша юха а. Шуна нийса хетий, оцу кепехь Iедалхоша нехан юьхь яхар?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG