Президентан Путинан гонашкарчу кхаа хьостанна тIе а тевжаш, РБК агенталло хаамбарехь, Оьрсийчоьнан конституцин хийцамаш халкъан кхоже боху де къастош, ши вариант ю йийцарееш – Охан-беттан 12-гIий, 26-гIий денош.
Халкъан кхоже Конституцин хийцамаш бохур бу Пачхьалкхан Думехь а, Федерацин Кхеташонехь а уьш тIеэцначул тIаьхьа.
Хийцамех лаьцна харжамхошка хоттур ду, элира Путин Владимира ша «Халкъе ДIахьедар» дечу муьрехь. Ткъа цо юьйцург яц референдум, хаттар халкъан кхоже диллар ду, билгалдаьккхира президентан пресс-гIоьнчас Песков Дмитрийс.
Хийцамех кхаж тосу де а, кепаш а шен омрица къастор ю Путина.