Зорба тоха
Абхазерчу оппозицин лидер дарбан хIусаме виллина юха а. Ткъа цуьнан агIончашна ца лаьа иза кандидаташлахь а воцуш харжамаш дIабоьлхийла. Оцу бахаьница сацийна шайн агитаци кхечу кандидаташа а, яздо "Кавказ.Реалиино".
Бжания Аслан цомгуш а хилла, оршоьтадийнан делкъал тIаьхьа Сочерчу дарбан цIийне кхачийнийла дуьххьара хаийтинарг ву «Фейсбук» чуьра аноним. ТIаьхьо кандидатан уьйраша а, журналисташа а дина иза бакъ. «Фейсбукехь» дийцарехь, цунна «юха а дIовш делла», амма официало ца боху иза бакъ ду.
Дийца даьккхинчунна дуьххьара комментари елларг ву Бжания Асланан уллера накъост, политолог Карчаа Ренат.
«Соче вахханчохь вон хилла цунна. Сихха цигарчу лоьрашна тIекхачийна. Гарехь, юуучух ун даьлла цунна», - аьлла Карчаас «Интерфаксе». Бакъду, кхин цул тIаьхьа цхьаммо а ца хьахийна юуучух ун кхетар, тIе ца чIагIдина иза официалехь.
Бжания могуш воцийла шайна хиича, дIахьош болу харжамийн болх шаьш сацабо, дIахьедина цуьнан шина а оппоненто – Ардзинба Адгура а, Дзапшба Леонида а.
Сарахь 4 сахьт даьлча Кхерамзаллин кхеташо гулъелла Сухумехь. Цо мехкан могашаллин министр Цахнакия Тамаз декхаревина Оьрсийчуьрчу шен коллегашца зIе латтон, ткъа Инарла прокурор Агрба Адгур – политик цомгуш муха хилла талла.
Кхин а цхьа сахьт даьлча хаам баьржира, Бжания дарба деш тиларчуьра а ваьккхина, Краснодарерчу лоьрашна тIекхачош а ву, аьлла.
Хиламо саготтабина харжамхой тебеш, цаьрца къамел дина, Бжаниян штаба чуьра араваьлла, штабан куьйгалхочо Анкваб Александра. «ЦIийлелар меттадалийна. Инсульт яц. Санитарийн кема лардеш бу Сочера лоьраш. Краснодаре вуьгуш ву», - аьлла цо.
Штабна хьалха гулбеллачу наха хаттар дира Анквабе, Бжанияна дIовш даийна бохург мел бакъду, аьлла. Оцу хъаттарна жоп лоьраша бен лойла дац, дара жоп. Штабо ша хIинццалц ма-барра бийр бу шен болх, амма кандидат кхочийла дац раже дехкинчу цхьаьнакхетаршка, бохура Анкваба.
Оршоьтан сарахь кхачийна Бжания Краснодаре.
Сухумехь сарахь 7 сахьт даьлча кхеташоне гулъелира парламент. Политикан могашаллица нисделларг талла йозушйоцу комисси кхолла еза, бохура депутаташа. Ткъа лор волчу парламентхочо Джинджолия Алхаса, бIегIийла дац лоьрийн балха юкъагIерта, элира кхеташонехь.
Ардзинба Адгуран харжамийн штабехь ву ша Джинджолия. Цо аьлларг иштта дара: «Вайн могашаллин министралла ю хьал тергалдеш. Краснодарера хаамаш а кхочу вайга. Лоьрийн болх дика бевза суна, цундела боху ас, лоьрашна вайн новкъа цагIертар ду гIо. Кхеташ ду, цига кхача-м деза вай, масала, могашаллин министр хьажо мегар ду Краснодаре. Министр сихха цига вахана хилехь дика дара – айлур дацара адам. Информаци яцаро сагатдойту массаьрга а. Коьртаниг эладитанаш цадаржийтар ду, долу хьал ма-дарра довзийтар».
Джинджолия Алхасца резахилира оппозицин векал-депутат Дбар Дмитрий.
"Онлайнехь хьал зуьйш, дуьйцуш вай Iахь, цакхетамаш а нислур бу, эладитанаш гIовтта а сахьт дац. 21 де дисина харжамаш тIекхача, парггIат дийца деза вай дан догIург. Ткъа Бжания Асланера хьал вай ишта а Iийр ду зуьйш. Комисси кхуллур ю вай – амма вай ма дац хьал талла дезарш, криминалисташ ма бу», - элира Дбара.
Депутата Лолуа Раула, халкъалахь лела шеконаш юьхьар а оьцуш, элира: «Махкара хьал эшон луурш а хила тарло. Бжания кандидаташлахь а воцуш атта дац харжамаш дIабахьа. Вай кхето деза и дерриг а. Бегаш бац Бжания Асланна гонах леларг, иза баккъал а хIума ду».
Лолуас дагадаийтира стохка а, шо гергга хьалха, Бжания дарбан хIусаме кхаьчна хилар, амма прокуратуро цуьнан бахьана дуьззина теллина а дацар. Ткъа депутатехь шеко а яц Бжанияна хIетахь цо биинчу цхьана кхачанах ун даьлла хилар.
«Абхазехь алтернатива йоцу харжамаш хиллане а хир бац!», - аьлла, Бжаниян штаберчу куьйгалхойн къамелашна тIе а тевжаш, депутата Айба Батала.
Кхеташо жамI доцуш йирзина – ца къастаделла парламентан комисси кхолларца дерг. Делахь а, кийча бу депутаташ муьлххачу хенахь а гулбала.
Буса а дIа ца боьлхуш, лаьттара Бжания Асланан агIончаш цуьнан штабна хьалха. Бжанияца цхьаьна вице-президент ваха язвелла волу Гунба Бадра велира нахаца къамел дан. Цо дийхира нахе дIабахар.
Шинаридийнахь мелла а гIолехь ву Бжания, бохура хьостанаша. «Молханаш луш, юьхьанца тиларчуьра ваьккхинера иза, хIинца меттавалийна, цIийлелар а, дог а дика ду», - хаам баржийна "Интерфаксо". Цуьнца къамелдинчу лоьро бахарехь, «шега делла хеттарш а кхетош, корта таIорца жоьпаш ло цо».
