ТIекхочийла долу линкаш

ЦIеххьана кхаьчна хаам!

Керланаш

Республикан дозанаш дIакъовлур ду Кадыровс

channel, March 31, 2020

Нохчийчоьно Оханан-беттан 4-хь дуьйна дIачIогIур ду шен дозанаш. Къевлина хир ду некъаш, лелар дац кеманаш. Цунах лаьцна шен Instagram-хь хаам бина Кадыров Рамзана, яздо РИА Новости агенталло.

Цхьаъ арадаккха оьшуш меттиг нислахь цунах лаьцна сацам бийр бу COVID-19 вирусца къийсам латто кхоьллинчу оперативан штабо, ткъа белхахошна лур ду леррина кехаташ, боху Кадыровс.

ДЕРРИГ КЕРЛАНАШ

Зулам дина Нохчийчуьра бахархой лецна Москвахь

Москван къилбаседанехь кIиран дийнахь хиллачу тасадаларшкахь 10-зза гергга герзаш диттина хилар тIечIагIдина РБК агенталлана Москварчу чоьхьарчу гIуллакхийн урхаллехь а. Мордовера веана хилла Седов Николай дуккха а чевнашца дарбан цIийне вигина. Иза воцург а лазийна Самаран кIоштара веана Мусаев а.

Агенталле шахьарарчу ницкъахоша дийцарехь, Каширскан некъаца лаьттачу цIеношна гергарчу автомобилан паркингехь герзаш диттина хиларх хаам бинера полицега суьранна ворхI сахьт долучу заманчохь. Кхаьчначу полисхойн каравеанера Оренбургера ши вахархо Русанов Вадим а, Евлампиев Максим а, Дзержинскера Титенек Герман а.

БархI сахьт долучу хенахь оцу инцидентан кхин а декъашхой дIалийцира полисхоша Ford машенца. Уьш хиллера Нохчийчуьра бахархой: Тепсуев Жамалай, Хачукаев Мохьмад, Мансаев Турпал, Сулейманов Хьусейн, Балиев Джамбулат а. Травматикан герзаш а, патармаш а даьхна цаьргара.

Талламан комитето бехкзуламан гIуллакх диллийна царна дуьхьал кхаа артиклехь - стаг вен кIело яр, бакъо йоцуш герзах пайдаэцар, харцхьа лелар.

Карантинан раж гIелйина дуккха а Европерчу мехкашкахь

Испани

Цхьа могIа Европерчу пачхьалкхашкахь оршотан дийнахь дуьйна, Стигалкъекъа-беттан 25-чу дийнера схьа, коронавирусан инфекци бахьана долуш юкъадаьхна карантинан дехкарш гIелдина.
Мадридехь а, Барселонехь а магийна доттагIашца а, гергарчаьрца а вовшахкхета, схьайоьллуш ю урамашкахь хIиттийна ресторанаш а, бараш а. Хьалхо раж малйинчу Испанин цхьайолчу регионашкахь кхин а маьрша даьлла дIасалелар. Пляже баха магийна бахархошна, нагахь санна, социалан дистанци ларъеш хилахь.

Италехь болх бан йолаелла спортан хIусамаш а, бассейнаш а. Цхьа могIа провинцешкахь самукъадаккхаран центраш а, хьешан хIусамаш а, лело машенаш ло меттигашкахь а болх бан юьйлаелла.

Чехехь болх болийна кафеша а, ресторанаша а, иштта отелаша а, юьхьанцарчу классашкахь дешар а долийна. Цул совнах, масканаш лелор а юкъарадаьккхина – нах гулбеллачу меттигашкахь а, транспортана тIехь а бен лело ца оьшу уьш.

Желтойн махкахь а, Германехь а схьайоьллуш ю нахана хьашташ латтон сфераш а, кафеш а, ресторанаш а.

Метрополитен болх бан йолаелла Украинехь. Масех де хьалха малдинера цигахь карантинан низамаш.

ТIаьххьарчу кIиранашкахь керла инфекци яьллачу нехан терахь де дийне лахлуш ду Европерчу дукхаболчу мехкашкахь. Иштта кIезиг бу леш болу нах а. КарабогIучу беттан 15-чохь, дийцарехь, схьадоьллур долуш ду Шенгенан зонерчу пачхьалкхашна юкъара дозанаш. Хууш дац арахьарчу мехкашка ваха бакъо маца лур йолуш ю.

Worldometers сайтан зерашца, верриг а Европехь, Оьрсийчоь а лерича, Стигалкъекъа-беттан 25-чу дийнахь къаьстина коронавирусан инфекцица 1 миллион 900 эзар сов стаг. Царах 883 дархочунна дарба хилла, 170 эзар гергга стаг кхелхина.

Къилбаседа Кавказ: 19 кхелхина, ун даьлла кхин а 540 стагана

ТIаьххьарчу дийнахь а, буса а Къилбаседа Кавказехь коронавирусан уьнах кхелхина 19 стаг, керла тIекхетта инфекцица 540 пациент. Эпидеми ца яржийта вовшахтоьхначу оперативан штабан зерашца, Дагестанехь велла 13 стаг, ГIалгIайчохь -кхоъ, Ставрополан махкахь - шиъ, Нохчийчохь - цхьаъ. Верриг а Къилбаседа Кавказехь кхелхина эпидеми юкъаяьлчхьана 266 дархо.

Къаьсттина дукха цомгаш нах къаьстина Дагестанехь: 110:

Дагестанехь +110 (4205)
Краснодаран кIоштахь +90 (3337)
ГIебарта-Балкхаройчохь+83 (2334)
Ставрополан махкахь +79(2011)
Къилбаседа ХIирийчохь+60 (2645)
ГIалгIайчохь +45 (1823)
Кхарачойн-Чергазийчохь+26 (783)
Адыгейхь +25 (696)
Нохчийчохь +22 (1112)

Верриг а Къилбаседа Кавказехь COVID-19 вирус кхетта ву 18 947 пациент. Оьрсийчохь бу уьш 353 427.

Къуръан Iамадойтуш ду Нохчийчоьнан Iедална лийначаьрга

Иллюстративан сурт


"Осал Нах 95" телеграм-чатехь Нохчийчоьнан куьйгалхой емалбина нах кхетош-кхиош бу, Къуръан а Iамош, яздо "Кавказ.Реалиин" портало, цхьана лаьцначу стеган нанас бинчу хаамна тIетевжина.

Охан-беттан 4-чу дийнахь дуьйна дIавигна ву цуьнан кIант. "Социалан машанашкахь яржийний хаьа суна, цо шена гечдар доьхуш, дIаязйина видеоролик, амма цуьнга хьажа ницкъ ца тоьира суна. Сан йоьIаршна гина. Адвокаташка ца девлла тхо, кхин тIе а вон дарна кхоьру цунна", - дийцина нанас.

Шена кIант ган лууш, иза лаьцначул тIаьхьа полицин декъе яхна а хиллера нана. "Полисхоша шаьш кхетош-кхиоран болх бу цуьнца дIахьош, иза Къуръан Iамош ву, элира соьга. Делахь а кхоьруш ю со, дийна цIа мукъане а вогIур велара", - боху йоьхначу нанас.

Полицин декъера комментари эца гIиртира "Кавказ.Реалии", амма, белхахой Марха достуш бу, балхахь стаг а вац аьлла, жоп делира.

Карладоккху, Охан-беттан юьххьехь Iедална муьтIахь болчийн телеграм-каналехь зорбане яьхнера бархI кIанта а, цхьана йоIа а гечдар доьхуш видеороликаш. "Осал Нах" телеграм-чатехь йозанаш динера шаьш, меттигерчу хьаькамашна луьйш аьлла, мукIарло динера цара. Гергарчийн хаамашца, уьш берриш лецна латтош бу.

Нохчийчохь бIеннашкахь бу полицино дIаяьхна машенаш юхаерзо аьтто боцурш

Нохчийчоь, Соьлжа-ГIала

Охан-баттера схьа дуьйна таханалерачу дийне кхаччалц чоьхьарчу гIуллакхийн министраллан белхахоша Нохчийчохь машенаш схьайохуш ю карантинан раж йохийначу нахера. Ткъа схьаяьхна машенаш к1оштийн полицин дакъошкарчу паркингашкахь дIахIиттийна ю. И хаам бина меттигерчу бахархоша. КIошташкарчу полицин дакъошкарчу паркингашкахь латтош ю шоферашкара схьяьхьна машенаш, яздо "Кавказ.Реалиино".

Болчу хаамашца, 200 гергга Нохчийчуьра вахархо таро йоцуш ву шен машен юхаерзо. Машенийн долахоша дицарехь, 10 эзар соьмера 20 эзаре гергга сом ахча охьадилла деза цара, нагахь санна, машен юхаезаш белахь. ГIуда такха таро яцахь, республикера изоляцин раж ерззалц собар дан дезар ду бахархоша.

Карантинан раж йохийначарна гIуданаш детта полицина бакъо юьтуш чоьхьарчу гIуллакхийн министраллан а, Москван куьйгаллин а бертана реза хиллачу Оьрсийчоьнан премьер-министро Мишустин Михаила куьг таIийра Охан-беттан юьххьехь. Изоляцин низамаш лар ца ден шофераш, омраца а догIуш, машенех баха йиш ю, иштта 5 эзар сом гIуда тIедожо а тарло царна.

Хууш дац, цу тайпа буьйр Нохчийчохь лелаш ду я дац. Диллинчу хьасташкахь цунах лаьцна документаш хааделла дац.

Колонешкахь а, СИЗО-хь а эпидеми яржарх карта хIоттийна бакъонашларъярхоша

Оьрсийчоьнан набахтешкахь а, талламан изоляторшкахь а респираторан цамгарш яржарх карти тIехь билгалдоккхуш, бакъонашларъярхойн тобано а, адвокаташа а "Серая зона" аьлла проект йолийна. "Коммерсанте" дийцина цунах лаьцна "Общественный вердикт" фондан директоро Таубина Натальяс.

ТаIзарш кхочушдаран федералан урхаллан (ФСИН) цомгашчерах лаьцна официалан статистика зорбане яьккхина ца Iаш, проекто информаци ло тутмакхаша а, церан гергарчу наха а бечу хаамашна тIехь а. Иштта проектан авторша зуьйш ю хаамийн гIирсаша Iорайоккху информаци а.

ХIора тIечIагIдан таро йоцчу меттигах бакъонашларъярхоша кехаташ дохьуьйту прокуратуре а, ФСИН-е а, набахтешкахь талламаш а бай, лецначарна а, колонийн белхахошна а кхерамзалла латтае аьлла.

"Информацин блокада а, юкъараллех ФСИН-ан урхаллаш, къаьсттина эпидеми йоьдучу заманчохь дIакъовлар а" дан мегаш доцург ду, аьлла бакъонашларъярхоша.

"Серая зона" проект юкъаяьккхинчарна хетарехь, тутмакхашна церан гергарнаш тIе ца битаро "социалехь хьал дуьйлина", хIунда аьлча, церан гергарчара сагатдо, шайн нахах цхьана а кепара информаци хаа аьтто ца хиларна.

Карарчу беттан 14-чохь тIаьххьара ФСИН-о хааме даьккхира, СИЗО-хь а, колонешкахь а лецначарна коронавирусан ун даларх. Урхаллан зерашца, эпидеми яьржичхьана 617 белхахо а, 145 шеконашца лецна а, тоьхна хенаш йоху нах а цомгуш хилла. Пенитенциаран системера 208 стагана а, 29 тутмакхана а дарба хилла. Беллачех хаийтина дац.

Вевзаш волчу футболистана Бакаев Зеламхана COVID-19 вирус кхетта

"Спартакан" фанаташ

Москварчу "Спартак" тобан футболхочуьнца, ГIалгIайчуьра схьаваьллачу Бакаев Зеламхаца коронавирусан ун къаьстина аьлла, яздо "Коммерсанто". Цхьана а кепара билгалонаш йоцуш токхуш ду ша лазар, шена коронавирусо бина эшам бац, аьлла Бакаевс.

Стигалкъекъа-беттан 21-чу дийнахь "Спартакан" ловзархой а, тренерийн штабан а, тоба ловзаршна кечъечу персоналан а декъашхой коронавирусан тестех чекхбехира.

Де хьалха инстаграмерчу шен аккаунте язбеллачаьрга, церан марханаш къобалдеш, вистхилла футболист. Иштта, цо дехар дина массаьрга а, цамгарш ца яржийтархьама чохь совцахьара аьлла.

Пандеми йирзинчул тIаьхьа ГIалгIайчу дуккха а туристаш оьхур бу аьлла, тешна бу меттигера Iедалхой

ГIалгIайчоьнан бIаьвнаш

COVID-19 пандеми йирзинчул тIаьхьа шайн республике 50 эзар гергга турист вогIур ву аьлла, тешна бу ГIалгIайчоьнан Iедалхой, хаам бо "Вестник Кавказа" гIирсо.

Республикан туризман куьйгалхочунна Мизиев Бесланна хетарехь, эпидемиологин хьолаца доьзна, шо чекхдаллалц чоьхьарчу туризме бахка са хьаьвзина хир бу нах. Оьрсийчуьрчу туристашна ГIалгIайчоь марзъярхьама махкахь цхьа могIа барамаш вовшахтоха Iалашо ю ГIалгIайчоьнан.

Маршо Радионо яздина ма хиллара, тIаьххьарчу заманчохь Кавказехь туризм кхуьуш ю бохуш, меттигерчу каналаша дийцина а ца Iаш, федералан тIегIанехь а дийца даьккхина. Делахь а, "Отдых в России" журналан а, "Рейтинг" цIе йолчу информацин коммуникацийн Центран эксперташа а 2019-чу шарахь юкъахь хIоттийначу рейтингехь, массо а регионаш а бохург санна, тIаьххьарчу могIаршкахь нисъелла.

67-чу меттигехь ю ГIебарта-Балкхаройчоь, Нохчийчоь - 71-чу, Къилба ХIирийчоь – 76-чу, Кхарачойн-Чергазийчоь – 78-чу, ГIалгIайчоь 81-чу меттигехь.

ТIаьххьарчу информацица, ГIалгIайчохь 1 778 дархо ву коронавирусан ун даьлла. Дарба хилла 779 пациентана, велла 38 вахархо.

Дийнахь-буса 18 стаг кхелхина коронавирусах, 566 – цомгуш хилла Къилбаседа Кавказехь

Коронавирусах 14 стаг велла Дагестанехь, 4 – Къилбаседа ХIирийчохь, уьнна дуьхьалоечу Оперативан штабо бечу хаамца. Верриг а велларг ву регионехь 247 вахархо.

COVID-19 хьакхаеллачийн терахьаш ишшта ду:

  • Дагестанехь дийнахь-буса +113 (4 095 юьхьанца схьа)
  • Краснодар-махкахь +92 (3 247)
  • ГIебарта-Балкхаройчохь +80 (2 251)
  • Ставропол-махкахь +77 (1 932)
  • Къилбаседа ХIирийчохь +62 (2 585)
  • Адыгейхь +49 (671)
  • ГIалгIайчохь +44 (1 778)
  • Кхарачой-Чергазийчохь +25 (757)
  • Нохчийчохь+24 (1 090)
  • Ерриг а Къилбаседа Кавказехь ун хааделла 18 406-зза. Оьрсийчохь, Оперативан штабо бахарехь, коронавирусо лаьцна 344 481 стаг.

Кадыровс видео чухула Марханаш къобалдина махкахойн. Амма ша ца гайтина

Нохчийчоьнан куьйгалхочо Кадыров Рамзана, республикан бахархойн Марханаш къобалдеш, видео хIоттийна шен телеграм-канале.

Ша Кадыров гуш вац цу чохь, цуьнан къамелах йоьзна Соьлж-ГIаларчу Жума-маьждигана хьалха яьккхина видео.

Атта хан яцара Мархийн баттанна кхаьчнарг, даьржина лела ун, дукхахберш кхерийна цо – иза кхеташ ду, мохк дика лаьттина коронавирусана дуьхьал, цундела баларш ма-хуьллу лахдан аьтто баьлла мехкан, элира Кадыровс.

Маршо Радионо хаийтина ма-хиллара, коронавирус хьакхаелла хиларх йолчу шеконца еарин дийнахь Москварчу цхьана дарбан цIийне кхачийна Нохчийчоьнан куьйгалхо.

Республикан парламентан спикера Даудов Мохьмада тIаьхьо даржийра, Кадыровн могашаллина кхераме хIумма а дац, аьлла.

Баттахь марханаш а кхаьбна, тахана уьш дерзар даздеш бу дуьнентIера массо а бусалбанаш. Уггаре коьртачех цхьаъ долчу кху дийнахь, хуьлуш ма-хиллара, вовшашна тIетта баха, хьошалгIахь шуьнах кхета йиш ца хилла нехан - ун ду даьржина. Делахь а, интернетехь, массо а социалан машанашкахь го, хеза церан довха дешнаш.

Марха досту де (Iийд ал-Фитр) – уггар дезачу денойх цхьаъ ду бусалбанашна. Марханаш кхобучу Рамадан-беттан тIаьххьара де ду иза. Оцу дийнахь нах бIеннашкахь лела вовшашка хьошалгIа, Марханаш къобалдеш.

₽27 000 000 гIо хьажийна Дагестанна Туркойчоьно

Стигалкъекъа-беттан 24-чохь, Марха достучу дийнахь, дIакхача тарлуш ду Туркойчуьра Дагестане хьажийна сагIа.

Республикерчу Iедалан векалша бахарехь, Дагестанна гIодар дийцаредира хьалхо Путин Владимира а, ЭрдохIан Реджепа а, ткъа кира махка дIакхочор а, цигахь дIасабекъар а тIедиллина Оьрсийчоьнан могашаллин министрна Мурашко Михаилана.

Дуьненаюкъарчу "ЦIечу ЖIаран" Туркойчуьрчу декъан директора Алтан ИбрахIима хаийтина ЭрдохIанан омрица гуманитаран гIо вовшахтоьхнарг шен хьукмат а, Туркойчоьнан чоьхьарчу гIуллакхийн министралла а хилар.

Новкъабаьккхинчу киранан мах 2 миллион 600 эзар лира бу (27,5 миллион сом).

Алтан ИбрахIима дийцарехь, 100 эзар кхузза тIекIел тегна масканаш а, 20 эзар уьнах дегI Iалашден комбинезон а, 20 эзар уьнах бIаьргаш ларбен куьзганаш а, хIо кечден 5 аппарат а, санитайзераш а, дуккха а кхин уьнна дуьхьало ен гIирс а бу Туркойчуьра Дагестане хьош.

"Дагестанехь коронавирусо хIоттийна ирча хьал тхуна довзийтира Туркойчохь бехачу кавказхойн диаспораша", - аьлла Алтана.

Туркойчуьрчу диаспорийн 13 федерацино дехна шайн Iедале дагестанхошна гIодар. Туркойчоьно накъосталла дечу пачхьалкхех 28-гIа ю кху муьрехь Оьрсийчоь. РогIехь хир ю Таджикистан, боху туркоша.

Магомедов Зияудинца коронавирус карийна

Магомедов Зияудин

Лаьцна, изоляторехь латточу "Сумма" бизнес-тоба кхоьллинчу дагестанхочух Магомедов Зияудинах коронавирус хьакхаелла, лазар юккъерчу хьесапехь ловш ву иза, хаам бо РБК агенталло.

Информаци елларг ю Магомедовн адвокат Цилюрик Виктория. Цо бахарехь, цхьа бизнесхо хилла ца Iа изоляторехь ун кхетта. "Цомгуш хилларш бу, царалахь ву цунна уллерчу камери чуьраниг а ", - аьлла адвоката.

Магомедов ун кхетта хилар цуьнан гергарчаьрга хаийтина "Лефортово" изоляторехь, уьш цунна тIаьхьабахча.

2018-чу шеран Зазадоккху-баттахь схьалийцира вежарий Зияудин а, Мохьмад а МагомедовгIар а, "Интэкс" компанин куьйгалхо Максидов Артур а. Цара тIе ца эцна шайна тIебаьхьна бехк.

Бехктакхаман дов долош лецна церан банкашкара активаш а, ахча а, долара машенаш а, хIусамаш а. Къоланаш деш, хьалхаваьлла хилла оцу тобанца карарчу хенахь Эмираташкахь къайлаваьлла веха "Глобалэлектросервис" компанин инарла директор Нагаплов Элдар.

9000 сов стагехь коронавирус гучуяьлла дийнахь-буса Оьрсийчохь

Гайтаман сурт

Уьнна дуьхьалоечу Оперативан штабан терахьаш: дийнахь-буса Оьрсийчохь коронавирус карийна 9 434 стагехь. Берриш а и ун кхеттарш бу 335 882.

Карарчу ханна, официало бахарехь, цомгуш ву пачхьалкхехь коронавирусах 224 558 стаг, товелла - 107 936. Белларш бу - 3 388.

Москвахь дийнахь-буса цомгуш хилла 3 190 стаг, тобеллачийн терахь цул сов ду 641-нна.

Халкъан хьаштийн Роспотребнадзор урхалло бечу хаамца, тестех чекхваьлла дийнахь-буса 276 100 стаг.

Къилбаседа Кавказехь дийнахь-буса 11 стаг велла, 550 цомгуш хилла коронавирусах

Гайтаман сурт

ТIаьххьарчу дийнахь-буса Къилбаседа Кавказехь коронавирусах кхелхина 11 стаг, кхин а 550 цомгуш хилла.

Уьнна дуьхьалоечу Оперативан штабо бечу хаамца, пхи стаг велла Дагестанехь, шиъ – Ставропол-махкахь, цхьацца - Адыгейхь, Къилбаседа ХIирийчохь, Нохчийчохь, Краснодар-махкахь. COVID-19 яьржичхьана схьа цунах велла 229 къилбаседа-кавказхо.

Массанхьачул дукха бу дийнахь-буса ун кхетта бахархой Дагестанехь.

Иштта ду терахьаш:

  • Дагестан +127 (3 982 юьхьанца дуьйна)
  • Краснодар-мохк +89 (3 155)
  • ГIебарта-Балкхаройчоь +80 (2 171)
  • Ставропол-мохк +74 (1 855)
  • Къилбаседа ХIирийчоь +67 (2 523)
  • ГIалгIайчоь +42 (1 734)
  • Адыгей +31 (622)
  • Нохчийчоь +20 (1 066)
  • Кхарачой-Чергазийчоь +20 (732)

17 840 стагах хьакхаделла ерриг а хенахь COVID-19 ун. Оперативан штабо бахарехь, Оьрсийчохь и терахь ду 335 882.

"Вайн паччахь могуш ву". Спикера Даудовс дийцина Кадыров Рамзанан могашаллах лаьцна

Нохчийчоьнан куьйгалхо могуш ву, онлайн-комментаторша кхечу агIор дуьйцуш, даржаден хабарш бух болуш дац. Иштта аьлла инстаграмехула мехкан парламентан спикера Даудов Мохьмада.

"Цхьацца эладитанаш ду… Далла бу хастам, вайн паччахь, Ахьмад-хьаьжин воI Рамзан могуш а ву, маьрша а ву", - тоьшалла дира цо пIераскан дийнахь шен къамелехь.

"Иттех стаг ву, шаьш аьлча хуьулуйтур долу хIуманаш дуьйцуш. Иза бакъ дац шуна, махкахой. Шуна массарна а хаьа уьш муьлш бу. Уьш изоляцехь бу, вайна изоляци дIаяьлча а ер яц дIа церан изоляци", - бохура спикера.

"Цхьацца протенташ юьйцу (Кадыровн пехаш 70% дIалаьцна лазаро, яздира хаамийн гIирсаша – ред.) – иза а бакъ дац шуна", - элира Даудовс.

"Кавказ.Реалиино" хаам бина ма-хиллара, еарийдийнахь коронавирус хиларх йолчу шеконца Москварчу цхьана дарбан хIусаме кхачийна Кадыров Рамзан.

Хаамийн гIирсаша яржайо "диканиг хуьлийла цалуучара" кхоьллина харц информаци, элира хьалхо инстаграмехула "Грозный" телеканалан директора, Кадыровн гIоьнчас Дудаев Ахьмада.

Дагестанехь леррина операци дIахьош 6 стаг вийна ницкъхоша

Гайтаман сурт

Дагестанерчу Хасу-Юртан кIоштарчу хьуьнхахь герз карахь хилла 6 стаг вийна леррина операци дIаяьхьначу Iедалан ницкъаша. Антитерроран комитето бечу хаамца, "низамхошна тIелата кечам беш хилла уьш".

Гоксув юьртана уллерчу хьуьнхахь "6 стагах лаьтта тIемалойн тоба ю" аьлла, информаци а кхаьчча, тIеман операци йолийна, шаьш карабало гIоьртинчу Iедалхошна цара герзашца дуьхьало йича, уьш байина, боху антитерроран комитето.

Iедалхойн версица, байинарш "Исламан пачхьалкх" олучу террорхойн тобанах хилла.

Охан-беттан 16-чу дийнахь дIаяьхьира антитерроран комитето таханлераниг санна йолу тIаьххьара операци. Оцу дийнахь Табасаранан кIоштарчу Даргава юьртана гергахь ницкъхоша вийра шайна тIемало ву аьлла хетта цхьа стаг.

Дагестанера лоьраш леткъа шайгарчу баланна

Нехан могашалла Iалашъеш къахьоьгучу медикийн проблемаш йовзуьйту интерактиван карта кхоьллина Оьрсийчоьнан медикийн йозушйоцчу "Лоьрийн альянс" юкъаралло. Оцу хьокъехь "Кавказ.Реалиига" хаам бира проектан куьйгалхочо Коновалов Ивана.

Проект юкъаяьлла дац ши де бен, амма хIинцале 400 арз ду карти тIехь билгалдаьккхина, ткъа кху муьрехь гучудоккхур ду юкъаралло кхин а 400. Царалахь бу Кавказан регионашкарчу медикаша бина а, медикийн эшамех наха бен а леткъамаш.

"Дагестанера кхочу аьрзнаш кеп-кепара ду. Вуно дукха лоьраш белла цигахь. "ЦIечу зонехь" болх барна шайна лур ду баьхна ахча луш дац, шаьш тестех чекх ца доху, уьнах Iалашдала духар, гIирс бац, боху цигарчу медикаша. Делахь а цкъачунна дукха дац Кавказера аьрзнаш, амма хIара юьхь бен яц тхан белхан я интернет а яц юьйцучу меттигашка юьззина дIасакхочуш. Суна хетарехь, кхача йолалур ю тхоьга цигара информаци а", - дийцира "Кавказ.Реалиига" Коноваловс.

Оьрсийчохь лаххара а 9479 медик ву коронавирус шайх хьакхаелла кху тIаьххьарчу баттахь, хаам бо Associated Press агенталло. И терахь гулделла 70 сов Оьрсийчоьнан регионашкарчу бахархошкара баьржачу, прессо бовзуьйтучу хаамийн буха тIехь.

Оццу агенталло бахарехь, 70 сов лор велла пачхьалкхехь, амма цхьаболчу медикашна хетарехь, кхин а сов ду и терахь.

Шаьш COVID-19 дуьхьал кечйина вакцина шайна тIехь зийна Москварчу эпидемиологин центрерчу Iилманчаша

Гайтаман сурт

Гамалеян цIарахчу эпидемиологин а, микробиологин а Халкъан талламан центрерчу белхахоша шайна тIехь зийна шаьш коронавирусана духьал кхоьллина вакцина, яздо "Интерфаксо", центран директорна, Оьрсийчоьнан Iилманийн академин академика Гинцбург Александра еллачу информацина тIе а тевжаш.

Гинцбурга дийцарехь, вакцина шайна тIехь зуьйш дакъалаьцна иза кхоьллинчара а, юхьанцара талламаш дIабаьхьначара а, технологаша а. Цхьа а вац царах вакцино могашалла эшийна, "массо а ву дийна, могуш-маьрша, шайн балхах воккхавеш ", - аьлла Гинцбурга.

Iилманчас бахарехь, вакцина кхоьллинчара иза деккъа дIа шайна тIехь зерхьама ца тохийтина шайна, "пандеми лелачу муьрехь шаьш уьнах Iалашдархьама, маьршша шайн болх дIабархьама" тохийтина.

Яьржина лелачу керлачу коронавирусан ген йоьзна оцу Центрерчу Iилманчаша ДНК-н аденовирусах – иштта кхоьллина ю кхин а ехха талла езаш йолу вакцина. Цомгушчарна тIехь цкъачунна зенза ю иза. Академика Гинцбурга бахарехь, масех бутт баьлча кийча хир ю Центро кхоьллина вакцина.

Экс-сенатор Арашуков а, цуьнан да а лаьцна латтор дIа ца дахдайтина Апелляцин кхело

АрашуковгIар, Рауф а, Раул а

Москварчу апелляцин Хьалхарчу кхело юхабаьккхина сенатор Iийна Арашуков Рауф а, цуьнан да а, кхин кхо фигурант а стаг верна толлучу девнаца доьзна Москва гIалин кхело кхидIа а лаьцна латто бина сацам.

"Москварчу апелляцин Хьалхарчу кхело Мосгоркхелан сацам юхабаьккхина, хьалхалеррачу кхеле юхаталла хьажийна лаьцна латто хан яхъярх долу гIуллакх", - аьлла кхелан пресс-векалта Буданова Любовас.

Дечкен-беттан 30-чу дийнахь, Федерацин Кхеташонехь Инарла прокурореан Чайка Юрийн къамеле ладоьгIуш а Iаш, лецира Кхарачой-Чергазийчоьнан сенатор Арашуков Рауф. Оццу дийнахь Басманан кIоштан кхело санкци елира иза изоляторехь латто.

Талламо АрашуковгIар – да а, воI а – бехке бо даккхий зуламаш дарна.

"ТIех говза" суртдиллархо лаьцна Черкесскехь

Гайтаман сурт

Черкесскерчу цхьана дешаран хьукматехь болх бен 60 шо долу суртдиллархо лаьцна, шегара дуккха а штампаш, клишеш, урхаллийн мухIарш а дохуш. Кхарачой-Чергазийчуьрчу Iедалан документаш, паспорташ, визанаш кечъеш хилла цо, карийна, масала, цо кечдина Доминикана-мехкан кехаташ а, дийцира республикерчу полицин пресс-векалтехь.

"Таллам берззалц олийла дац, цуьнга шайна документаш кечдайтинчу бахархойх хиндерг", - элира урхаллехь.

Карарчу хенахь дIаса ца ваха, цIахь Iан декхаревина ву суртдиллархо.

Оьрсийчоьнан чоьхьарчу гIуллакхийн министраллин статистико гойту харц документаш кечдийраш алссам буйла пачхьалкхехь. Масала, 2017-2018 шерашкахь Iорадевлла цара дина иттаннаш зуламаш.

COVD-19 Къилбаседа Кавказехь: 28 стаг велла, 499 цомгуш хилла дийнахь-буса

Уьнна дуьхьалоечу Оперативан штабан информацица, тIаьххьарчу дийнахь-буса Къилбаседа Кавказехь коронавирусах велла 28 вахархо, ун кхетта кхин а 499 стагана.

Беллачех Дагестанера ву 24 стаг, ГIалгIайчуьра а, Ставропол-махкара а – шишша. Юьхьанца дуьйна схьа Къилбаседа Кавказехь уьнах кхелхина 218 вахархо.

ТIаьххьарчу дийнахь-буса коронавирус кхетта:

  • Дагестан +109 (верриг а 3 855)
  • Краснодар-мохк +92 (3 066)
  • ГIебарта-Балкхаройчоь +71 (2091)
  • Къилбаседа Х1ирийчоь +69 (2 456)
  • Ставропол-мохк +53 (1 781)
  • ГIалгIайчоь +44 (1 692)
  • Адыгейхь +30 (519)
  • Нохчийчохь +20 (1 046)
  • Кхарачой-Чергазийчохь +11 (712)

17 218 вахархочуьнгахь карийна COVID-19 Къилбаседа Кавказехь. Ерриг а Оьрсийчохь ун хьакхаделла 326 448 стагах.

Ставрополера тIеман лоьраш бахана коронавирусаца къийса Буйнакске

100 стаг чувижо таро йолу лазартни схьайоьллуш бу тIеман лоьраш Дагестанерчу Буйнакскехь, боху "Интерфакс" агенталло.

COVID-19 ун кхеттачу дагестанхошна дарба лелор ду цигахь.

22 машенах лаьттачу ковранахь веанарг ву 100 сов эскархо, шайлахь 70 медик а волуш.

Лазартнин долахь ю пехашна хIо латтаден аппараташ, пациенташ тергалбен монитораш, УЗИ а, рентген а йоккху гIирс. Таро ю тIеман лоьрийн цIий талла а, уьнан битамаш каро а.

Кеп-кепара йолчу информацица, коронавирус яьржичхьана схьа Дагестанехь велла 40-50 медик. Оперативан штабо бахарехь, 3 855 вахархочух хьакхаделла ун, велла 65 стаг.

Сочин имама Марха цIахь дастар доьху бусалбанашка

Туапсе кIоштан а, Сочи гIалин а имама Шхалахов Батмиза Мархийн дезденош шайн-шайн хIусамашкахь дIадахьар доьху бусалбанашка, хаам бо "Туапсен керланаш" ("Вести Туапсе") газето.

Хьоьху Шхалаховс нахана кешнашка бахар юкъахдитар а, Марха къобалдеш, нахехула дIаса цалелар а.

Стигалкъекъа-беттан 23-24-чу деношкахь досту Марха.

Марха досту де (Iийд ал-Фитр) – уггаре дезачу денойх ду бусалбанашна. Марханаш кхобучу Рамадан-беттан тIаьххьара де ду иза. Оцу дийнахь нах бIеннашкахь лела вовшашка хьошалгIа, Марханаш къобалдеш.

Хьарамлонаш лелор даьржина ГIалгIайчохь

Гайтаман сурт

Карарчу шарахь 100 сов стаг нисвелла ГIалгIайчохь хьарамлонашна кIел. Оцу хьокъехь хаам бина "Кавказ.Реалиига" мехкан чоьхьарчу гIуллакхийн министраллехь.

"104 стаг ву кхушара харцонна буханисвелларг, зуламаш деш ду хан хене мел йолу. Коронавирус яьржинчу беттанашкахь жоьлгаллин керла кепаш юкъаевлла, масала, изоляцин хьал талхийна ахь, гIуда охьадилла, олий, смс йогIу, я хьуна цхьа компансаци ю луш, хьайх лаьцна информаци ло, олу – Iехало нах", - дуьйцу полицин векалша.

Коронавирусана дуьхьал молха ду духкуш, олий, яржочу рекламано тешнабехк бинарш а дукха бу ГIалгIайчохь.

Хьарамлонаш ярца гучудевлла зуламаш, дIадахначу шеран хьалхарчу беттанашца дуьстича, 60% дукха ду махкахь кхушара.

Оцу могIарара зуламаш совдовлар далхадо кхечу регионийн низамхоша а. Къилбаседа ХIирийчохь, масала, тешнабехкаца, Iеха а йина, пенсионере 700 эзар сом банкехула шайна дехьадаккхийтина зуламхоша.

Прессера: Кадыров сихонца Москва кхачийна, коронавирус кхеттачух тера ду

Кадыров Рамзан, Нохчийчоьнан куьйгалхо, коронавирус хьакхаелла хиларх йолчу шеконца Москварчу цхьана клинике виллина, хаам бо Lenta.ru портало, Телеграмерчу Baza канална тIе а тевжаш.

Официалехь йоцчу информацица, пехийн цамгар кхетта Кадыровна.

Нохчийчоьнан куьйгалхо дарбан хIусаме кхачийна хилар "Интерфаксе" бакъдина Москварчу лоьрийн гонашкахь.

"Кадыровца коронавирус хуьлучух тера ду, медикийн тергонехь ву иза", аьлла агенталлица къамел хиллачо.

Официалехь я бакъдеш а, я харцдеш а дац даьржинарг. Нохчийчоьнан Iедалан информацин урхаллин векалша шайга динчу хаттарна, Znak портало бахарехь, делла жоп иштта ду: «Оха ца ло цхьа а информаци".

Мехкан телерадиокомпанин директора, Кадыровн гIоьнчас Дудаев Ахьмада news095 инстаграм-агIонехь дIахьедина, хаамийн гIирсаша "вониг хилийта луучийн" информаци ю яржош, аьлла.

Хьалхо "Кавказкий узел" портало яздира, Нохчийчоьнан куьйгалхой масканаш а йоцуш го цхьацца барамашкахь, аьлла. Зазадоккху-беттан 25-чу дийнахь Кадыров Рамзана дакъалецира бIеннал а сов нах гулбеллачу барамехь – Соьлж-ГIалахь Искусствон ЦIа схьадоьллуш. Цхьа а вацара гулбеллачаралахь юьхьах маска йоьллина. Охан-беттан 3-чу дийнахь мехкан куьйгалхой цхьаьна ламазаш деш гайтира, масканаш лелор ша Кадыровс тIедожийна делахь а, яцара уьш цаьргахь.

ТЬIаьххьара болчу официалан хаамца, 1026 стагехь карийна коронавирус, велла уьнах махкахь 11 вахархо.

Хьажа кхин дIа а

XS
SM
MD
LG