ТIекхочийла долу линкаш

ЦIеххьана кхаьчна хаам!

Осмаев Адамна кIелоян дагахь хилла аьлла, инарла лаьцна Украинехь


Осмаев Адам

Нохчийчуьра схьаваьллачу Осмаев Адамна кIело йинарг ву аьлла, шеконашца лаьцна Украинан кхерамзаллан урхалло (СБУ) шайн белхан накъост инарла-майор Шайтанов Валерий. Украинехьа оьрсийн сепаратисташна дуьхьал тIемаш бечу Осмаевс ша бина цунах лаьцна хаам "Кавказ.Реалии" портале.

СБУ-н белхахошкара кхаьчна шена аьлла цо инарла лацарх информаци. СБУ-н куьйгалхочо дIахьедарехь, Шайтанов Оьрсийчоьнан ФСБ-но шайгахьа верзийна хиллера 2013-чу шарахь. Даймахкана ямартваларна а, терроризмна а бехкевинчу цунна дуьхьал даьхна бехктакхаман гIуллакхаш дара.

Шайтанов оцу зуламашна бехкехиларх, ишта Осмаевна тIелатар кечдарх а, шайгахь аудион а, видеон а тоьшаллаш ду бохуш, чIагIдо кхерамзаллан урхалло.

Шен къайлахчу сервисашкарчу хьосташна тIе а тевжаш, Украинан парламентан хиллачу депутато Мосийчук Игора "Кавказ.Реалии" портале дийцира, Шайтановс кечден зулам чекхдаккха дезаш хиллера 2017-чу шарахь аьтто боьхна тIелатар динчул тIаьхьа а, оццу шарахь Осмаевн хIусамнана Окуева Амина йийначул тIаьхьа а аьлла.

Оьрсийчоьно бехкевеш ву Осмаев Адам пачхьалкхан президентна Путин Владимирна кIелоян кечлуш хилла ву бохуш. 2014-чу шарахь Украинехь хан тоьхнера цунна бакъо йоцуш герз а, лоьлхуьйтурш а лелорна. Одессерчу СИЗО-хь хан яьккхинчул тIаьхьа маьршаваьккхира Осмаев.

Дудаевн цIарах хиллачу батальонан хьалханча Мунаев Iийса вийначул тIаьхьа Осмаев хIоттийра тобан лидер.

Комментареш

New Comments Available

Оха хьоьхург

XS
SM
MD
LG