Нохчийчоьнан парламентан спикеро Даудов Мохьмада бакъ ца йина, республикехь шолгIа а изоляцин раж кхайкхош ю бохуш, яьржина информаци.
"Жигараллица дIасакхоьхьуьйтуш аудио хаамаш бу, карабогIучу беттан 5-чохь дуьйна нахана юха а чуьра арадовлар доьхкуш ду бохуш. Ас дIахоуьйту шуьга, уьш шира хаамаш бу, Стигалкъекъа-баттахь махкахь цхьацца дозанаш деттарх лаьцна бина хилла. Оцу юкъара схьахадийна аудио ю, таханалерачу дийнахь бина хаам болуш санна, яржош", - аьлла Даудовс.
Парламентан куьйгалхочо иштта билгалдаьккхина, нагахь санна Оьрсийчоьнан Роспотребнадзоро тIедехкина дехкарш бахархоша кхочушдахь, махкара эпидемин хьал телхар дац аьлла.
"Доккхачу декъанна, лело еза масканаш, вовшашна юккъахь дистанци а ларъеш, нах гуллучу меттигех къехкаш, барамаш ларбан безар бу. Нагахь санна, и кепаш вай ларъяхь, цхьа а карантин хир яц", - аьлла, тIетоьхна Даудов Мохьмада.
