Сатирикан Charlie Hebdo журнална Нохчийчуьрчу "Вести республики" ("Республикан хаамаш") газето ехкина карикатураш шен контентера дIаяьхна Инстаграмо. Социалан машанан администрацино иза доьзна газето "юкъараллера низамаш дохорца".
Газето карикатураш арахецнера Лахьан-беттан 3-чу дийнахь. Иза ша "Малхбузерчу псевдожурналисташна догIуш делла жоп" ду, яздинера "Республикан хаамаша".
Американ социалан машанаша шалха стандарташ лелош хилар гойту тоьшалла ду карикатураш дIаяхар, аьлла хета Нохчийчоьнан информацин а, зорбанан а министранна Дудаев Ахьмадна. "Цхьаболчу хаамийн гIирсашна дерриг а мегаш нисло, Делах теша миллирд нах сийсазбан а тIехь. Ткъа тхан гIирсанна, масала, оьздангаллин гурашкахь аьлларг а даржо ца мегаш нисло", - дIахьедина Дудаевс.
- Charlie Hebdo журналлна гонах лела дов меттахIоьттина Францера хьехархо Пати Самюэль верца доьзна. Хьехархочун корта баьккхира Мохьаммад Пайхамар аьшнашвеш дуьйцучу журнало ехкина карикатураш цо школехь берашна гайтарх бахьана а дина.