Оьрсийчуьрчу къайлахчу сервисаша (ФСБ) хаамбина, доьдучу 2020-чу шарахь Къилбаседа Кавказехь терроран кепехь 15 зулам юкъахдаьккхина шаьш аьлла. "Шо доладелчхьана Къилбаседа Кавказехь дан лерина 15 терроран зулам юкъахдаккха аьтто баьлла", - аьллачу ФСБ-н урхалхочун Бортников Александран дешнаш далийна РБК агенталло.
Къайлахчу сервисийн белхахоша тIемалой бара аьлла, 35 стаг вийна, кхин а 53 лаьцна ву. Дуьненаюкъарчу террорхойн организацийн 23 гара хIаллакдина шо доладелчхьана аьлла, тIетоьхна цо.
ГIадужу-беттан юьххьехь ФСБ-но дIахьедира Кхарачой-Чергазийчохь а, Дагестанехь а дуьненаюкъарчу экстремистийн динан "Ат-Такфир Валь-Хиджра" юкъараллан ши тоба хааяларх.
2018-чу шарахь оперативан барамаш дIахьочу заманчохь Кхарачой-Чергазийчоьнан ФСБ-н а, чоьхьарчу гIуллакхийн министраллан белхахоша а меттигера бархI вахархо лецира. Уьш бехкебира "Ат-Такфир Валь-Хиджра" тобанехь хилла аьлла.
Оьрсийчуьрчу бакъоларъяръоша а, адвокаташа а дIахьедо, тIемалой бу аьлла, дIакхайкхийначу наха кхелашкахь мукIарло дарх, тIехь ницкъ а беш, бехкаш тIелецийтина шайга бохуш.
