Нохчийчоьнан куьйгалхо Кадыров Рамзан реза ца хилла Куьрчалахь крела йинчу берийн майданахь дехкийнчу васташна. Цунна хетарехь, бераш ловзучу меттехь бахка хьашт дац америкахойн Marvel-комиксашкара турпалш.
"ДIаяха еза хIара коьртехь кхоьллина персонажаш, хIара фантази. Вайн бакъболчу турпалхойн суьрташ дIадетта", - омра дина Кадыровс.
Мехкан куьйгалхо реза ца хилларш бу Капитан Америка, Аьчка стаг, Стаг-Гезг, кхиболу а комикс-турпалхой – иза го социалан машанашкахь яьржинчу видео чохь.
- Хьалхо хаам баьржира, Нохчийчуьрчу Iедало 9,6 млн соьманна тендор кхайкхийна махкахь президент лаьттинчу Кадыров Ахьмадан цIарх мидалш а, орденаш а эца, аьлла. Шарахь оьцучу оцу тайпанарчу совгIаташна Нохчийчоьне дойъу ахча кхаьчна 34,6 млн соьме.
-