ГIебарта-Балкхаройчуьрчу гIаланашкахь Iедалан ницкъаш Оьрсийчохь магийна йоцчу "Иегован Тешаш" тобан декъашхойн цIенойх хьуйсу кху деношкахь. И мур болийна кхело махкара вахархо Залипаев Юрий бехказваккхарца доьзна.
"Каспаров.Ru" портало бечу хаамца, ГIебрта-Балкхаройчуьрчу Эльбрусан кIоштарчу талламхой декъера Гятов Шемал ву болам айбинарг. ХIусамех хьийсина Iедалхой Тырнаузехь а, Майский а гIаланашкахь.
Девнаш ду махкахь цхьацца болчу "иеговхошна" дуьхьал айдина. "Бахархошка цхьацца литература кхийдорца, къамелаш дарца цара экстремизман цхьаьнакхетаралле ийзабо бахархой", аьлла бу талламчаша динлелочарна тIекхоьхьу бехкаш.
- Динан экстремизм яржорна бехктакхаме озийна Залипаев Юрий бакъвира Майскерчу кIоштан кхело ши бутт гергга хьалха.
- Бакъоларъечу "Мемориал" центрана гарехь, динлелорхошна дуьхьалояр ду "Иегован Тешаш" тобанера нах бехктакхаме ийзор. Оцу бахьаница набахтешка хьийсийна нах политикан тутмакхаш лору "Мемориало".