ГIалат
Кху дахаро, мехах тарлой,
Текхадо вайн денойн тай.
Шен шеддаш до новкъахь хено,
Мел дIадахна хьоьжуш вай.
Некъан чаккхе хилар дицдой
Стеган даго хIун ца до?!
Цкъа лела и тIемаш кеглой,
Цкъа дийнна лам лестабо.
И киртигаш хуьлу хала.
Воккху цара атта гал.
Хуьлу ирча, хуьлу хаза
Цара юьтуш йолу лар.
Ваьхна олу, нагахь ваьхнехь.
Хено декхар диц ца до:
ДIайоьдучо гIалат даьхьнехь
ЙогIун йолчо лазаво.
Цуьнан лазам дагчу бижна ,
Ас хIинццехьа къурдаш до:
«ХIунда, хIунда тIе ца кхаьчна
Цу гIалатна, - бохуш, - со?»
1979 ш.