Москварчу Савёлово кIоштан кхело лаца кхайкхийна мехах Воронежера совдегар Корнев Кирилл вен кечамбарна Алероев Iаьрби а, Нальгиев Ислам а, Замураев Иван а, яздо "Коммерсанто".
Талламо бахарехь, 2016-чу шеран бIаьста мехах цхьамма дехна Нальгиев Исламе Корнев Кирилл вер. Нальгиевс, реза а хилла, шеца цхьаьна дехар кхочушдан ши накъост лехна – Замураев а, Нохчийчохь ФСБ-н урхаллехь леррина гIуллакхаш дIакхехьна подполковник Алероев а. Корнев вен тIаьххьара миноташ йисинчу хенахь зуламна духьалойина Iедалан белхахоша.
2019-чу шарахь кхелехь бехккъастохоша жоьпаллах хьалхаваьккхира и кхоъ, амма прокурора аппеляци йира сацамна, юхалуьстучу кхачийра дов. Амма оцу хенахь бевдда, карош бац кхеле ийзийнарш. Карийча, шина баттана уьш лецна латтор бу Iедало.