ТIекхочийла долу линкаш

ЦIеххьана кхаьчна хаам!

Нохчийчохь хатта тарло Джумаевн дов


Гайтаман сурт

Митингехь омонхойх леттачу 20 шо долчу Москварчу студентан Джумаев Сайд-Мухьаммадан гIуллакх Нохчийчохь талла схьадехна нохчийн талламчаша. Талламан комитетерчу Кавказ.Реалиин хьостано бина и хаам

"Оьрсийчуьра Талламан комитет реза хила тарло Нохчийчохь листа и гIуллакх дIадала. Низам дохийначу Джумаевн дов кхелехь хоттур ду, цунна арахь яккха хан тоха тарло", - аьлла къамел динчо. Цо бахарехь, Нохчийчуьрчу Iедалхоша Джумаевна гIо деш хиларх хаало, цуьнан гергарчу нахаца цхьанакхетарца а, Iедалхоша дечу дIахьедаршца а.

Хьалхо нохчийн парламентан спикеро Даудов Мохьмада дIахьедира, да цхьана а воцуш, кIант нанас ша кхиийна хиларе терра, яьлла ледарло ю иза аьлла.

Стундентехьа узуш йистхилла иштта Нохчийчуьрчу адамийн бакъонаш Iалашъечу кхеташонан декъашхо Саратова Хеда а. Цо дийцарехь, Джумаевна хууш ца хилла, ша низам дохош хиллийла, цо дехар дина массо а бакъоларъяхошка кIантана гIо дахьара аьлла.

Москвахь Навальный Алексейгахьа болчу наха хIоттийначу митингехь омонхошна дуьхьал тасавеллачу университетан дешархочо Джумаев Сайд-Мухьаммада дийцина, шен девне валарх.

"Сан кхетам бацара, иштта доьрзур ду аьлла. Цхьанна а чов ян Iалашо яцара сан. Нахаца харцо лелош гира суна, гулбеллачех дIа а кхетта, со мохь бетта вуьйлира, тIаккха царех тасавелира. Цхьанадекъан сайн бехк хиларна къера ву со, хIунда аьлча, хIетахь дерриг а цхьа кхечу тайпа гора суна", - аьлла, дийцина Джумаевс "Московский комсомолец" газетан корреспонденте.

Пресненскан кхело Зазадокху-беттан 23-чу кхаччалц лаьцна вуьтуш сацамбина Джумаев. Цунна бехкедиллина, Iедалан векална дуьхьал тасавалар, яздо "Новости" агенталло.

Кху беттан 23-чохь Москвахь Навальный дIахецар тIедожош хIоттийначу митингехь омонхошна дуьхьало ярх Джумаев Сайд-Мухьаммада. Видео интернетехула яьржинчул тIаьхьа полицино лехамашка веллера иза.

Еарин дийнахь лецира Джумаев Псковн кIоштахь. Оьрсийчоьнан дозанехула дехьа а ваьлла, Прибалтикехь къайлавала Iалашо хилла цуьнан. Джумаевс лелош хиллачу мобилан телефонца аьтто баьлла, иза волу меттиг билгалъяккха.

Социалан машанашкахь яржийначу видео тIехь гуш ду, куьйгашца а, когашца а жимачу стага шена тIе гIожамаш еттачу ОМОН-ан эскархошна дуьхьалоеш.

"Бакъволу къонах", "киборг бохуш, дуккха а комментареш йитира Сайд-Мухьаммадах баккхийбечу наха видеона бухахь.

Оьрсийн оппозиционере Навальный Алексейгахьа хIоттийначу акцехь омонхошна дуьхьал тийсавелла аьлла, лаьцна Джумаев Сайд-Мухьаммад дIахецар тIедожош Москвахь цхьааллин пикет хIоттийна Пхунтсок Дина дIалаьцнера полицино. Протокол а хIоттийна, кхин а дукха латта а ца еш, маьршаяьккхина хиллера иза Москварчу Тверскойн полицин декъо.

ПIераскан дийнахь пикете яьллачу жигархочун карахь плакат хиллера: "Маьршаваккха Джумаев!", "Политикан тутмакхашна маршо ло!", "Бехке мел воцург маьршаваккха!" аьлла, тIеяздина.

Джумаевн цIе тIехь хиларна лаьцнера шаьш аьлла хиллера полицино Пхунтсоке, вуьшта цхьааллин пикеташ йихкина яц Оьрсийчохь.

Хьажа комменташка (1)

Комментареш

New Comments Available

Кремло Соьлжа-ГIалина "ТIеман Сийлаллин ГIала" цIе тилларца, махках даьккхина къам къинтIера даккхар лорий аш?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG