Алтай Республикехь бехктакхаме озийна говрийн ремина тIелетта полисхо. Талламан версица, Усть-Кокса юьртана уллехь цо йийна 9 говр. Информаци тIечIагIйина чоьхьарчу гIуллакхийн министраллин регионан урхалло а, прокуратуро а.
Оцу хьостанаша дийцарехь, полисхочо шен долара таллархочун топ йиттина говрашна. Хилла иза Зазадоккху-беттан 29-чу буса Власьево а, Тюгурюк а ярташна юккъехь. Ежаш лелачу говрашна тIелеттачо меттигерчу бахархойн 8 кхел а, цхьа бекъа а йийна, шина говранна чевнаш йина. Долахоша шайн хилла зен ду боху 1,3 миллион соьмана. Бехктакхаме озийна полисхо нехан бахам хьаллакбарца доьзна.
Зулам хIун бахьаница дина хууш дац. Меттигерчу полицин тобан куьйгалхо хилла иза. Ткъа тIекхача аьтто болчу хьостанаша 2019-чу шо доьрзуш оцу даржехь хилла аьлла вовзуьйтург ву майор Алашев Сидур. Регионерчу полицин буьйранчина бехкбиллина прокуратуро, белхахой кхетош-кхиор, церан профессионализм лакхаяккхар кхачаме дац аьлла.
