Москвахь лаьцна талламах лечкъаш лелла Котиев Ризван, хаам баржийна ГIалгIайчуьрчу Талламан комитетан урхалло. Иза бехкево махкарчу телегойтийлехь программа лелош хилла журналист, ГIажарий-Юьртан вахархо Кокурхоев Амирхан вуьйш дакъалацарна.
Диъ шо дара Котиев федералан лехамехь волу. Иза Гуьржехула Туркойн махка а вахана, цигара Европе кхаьчна аьлла яра юьхьанцара информаци.
Талламан версица, Кокурхоевца "дов даьккхина хилла дахаран хьелашца доьзна" лулахочо, хIинца лаьцначу Котиевн дас, 2017-чу шеран Дечкен беттан 1-чу дийнахь. Ризван, юкъа а воьлла, лета волавелла Кокурхоевх, шен дега иза вен бохуш мохь а бетташ. Журналистана урс тоьхна. Хиллачу чевнах велла иза. Котиевн дас бехк шена тIеэцна, амма низамхоша да а, воI а цхьабосса декъахь лору зуламна.
ХIинца Котиев Ризван даймахка юхавалийна.
- Кокурхоев Амирхан телепрограмма лелош а, Соьлжан кIоштарчу администрацехь пресс-векал а хилла.
- Соьлжан кIоштан кхело Котиев Ризванан да бехке а вина, набахте хьажийра 8,5 шарна. Ша Котиев зулам динчу меттера ведира, лаца кхайкхийна вара иза зулам дан да хьалхатоьттуш хьийзарна.
