Нохчийчуьра схьаваьллачу 49 шо долчу Гантемиров Якъубна – нахера деши хIуманаш оьцучу туькан куьйгалхо хилла иза – Францерчу Монтобанехь йинчу кхело кхачийна набахти такхар. Иза бехке лору, деши чохь долчу меттигашна чу а вуьйлуш, 75 къола дарна. Оцу хьокъехь хаам баржийна меттигерчу La Republique des Pyrenees газето.
8 шо хан тоьхна Гантемировна. Кхело дихкина цунна Францехь ваха. Иза воцуш, кеп-кепара хенаш йиттина цуьнца цхьаьна къоланаш лелийначу 8 гуьржийчунна а.
Болчу хаамца, тобано къоланаш деш хилла Беарн провинцехь а, Францин ерриг а къилба-малхбузехь а.
- Охан-бутт боьрзуш Францехь лецира 28-48 шераш долу ворхI кавказхо. Шеко яра Iедалан уьш террорца бозабелла хиларх а, цара Шема ахчанаш хьийсорах а.
- Хьалхо Францино депортаци йира Нохчийчуьрчу мухIажарна Гадаев Мохьмадна. Иза карарчу хенахь Нохчийчохь ву, амма иза Iедало къайлаваьккхина меттиг хууш яц гергарчарна. Ша Францера араваккхале, протест кхайкхош, шен гай этIийра Гадаевс.
