Инстаграмехь къамелдеш Кадыров Рамзана жоп делла шега цхьамма динчу хаттарна: стенна дIадаьхна спортхочо Чимаев Хьамзата инстаграмера шеца даьхна хилла суьрташ.
"Суна баккъал а ца хаьа, цо уьш стенна дIадаьхна. Соьга цо и ца хиттина. Суна сайна а ца вевзина иза дукха хан йоццуш бен", - аьлла Кадыровс.
Нохчийчоьнан куьйгалхочо кхидIа аьлла Чимаевх лаьцна: "вуно дика хиндерг долуш латархо ву иза", "похIма долуш кхиина кIант ву".
Нохчех волчу UFC-н Швецерчу латархочо Чимаев Хьамзата цIеххьана "дIацIанйира" деношкахь шен инстаграм, дIахедира Нохчийчоьнан куьйгалхочо Кадыровс лелочу аккаунтах. Ша Американ Цхьаьнатоьхначу Штаташка, рогIехь октагоне вала кечвала Лас-Вегасе ваххале дина цо иза.
- UFC-н чемпионатехь рекорд хIоттийра Чимаевс – 66 денна чохь туьйлира кхузза. Карарачу шеран юьхххьехь критика йира цунна, цо Нохчийчу а вахана, Кадыровца суьрташ а дохуш, цо совгIат йина Мерседес машен схьа а оьцуш хьийзарна. Спортхочо цул тIаьхьа дIахьедира, могуш вац ша, спорт юьтуш ву, аьлла. Амма Зазадоккху-беттан юьххьехь Кадыровс, Швеце кема а хьажийна, Нохчийчу дIавигира иза, даржийра, "Ахмат" клубехь кхидIа а яхлур ю Чимаевн карьера, аьлла.
