СИЗО-хь веллачу Белгородера волонтеран Демиденко Александран доьзало полицига хаам бина йайна машенах лаьцна. Дийцарехь, "Ахматан" эскархоша дIалоцучу хенахь Демидов хилла оцу машенахь. ТIеман полицино дакъалацар юкъара даьккхина, талламхойн эха шарахь кхин аьтто ца баьлла и машен схьакаро, хаам бо "Пепел" зорбанан гӀирсо.
Цуьнан доьзале дӀакхачийначу талламан материалаш тӀехь йаздина ду, Демиденко шен машенехь волуш, "Ахмат-Запад" эскархоша лаьцна дӀавигина шайн эскар лаьттачу метте. Кадыровн наха волонтеран машен лачкъийна хилар тӀечӀагӀдина тешаша – цу тIехь полисхоша машен лехар чекхдаьккхира, ткъа гӀуллакхан йерриг а материалаш дӀайелла Воронежан гарнизонан Талламан комитете.
ХӀинца йалх бутт бу и машен схьа ца карон. Демидовс машен кредитаца эцна хилла, хIинца а, таханлерчу дийне кхаччалц, и дӀалуш бу веллачу волонтеран доьзал.
Оьрсийчоьнан Талламан комитето Белгородан кӀоштан 3 йолчу СИЗО-хь Демиденко валаран хьокъехь бехктакхаман гӀуллакх ца долийра. СИЗО чуьра белхалоша, йа талламхоша цхьа а низамехь доцу хIума ца дина аьлла вуьйцучу стагана дуьхьал - хаам бина урхаллехь. ТаӀзарш кхочушдаран федералан урхаллехь (ФСИН) дӀахьедина, стаг валаран бахьана - ша-шена тӀе куьйгаш дахьар ду аьлла.
- Украинехь тӀом болабелча дуьйна 61 шо долу Демиденко Александр тӀамна дуьхьал пикеташ йеш, бӀеннаш украинхойн мухӀажаршна гӀо деш вара: цо уьш шен цӀахь тӀеоьцара, иштта гӀо дора царна даймахка юхаберза, ахча а луш уьша дозане кхаччалц дIабуьгара.
- Стохка, гIадужу-баттахь Демиденко нохчин ницкъахоша лаьцна дIавигинера, мича вигина цахууш, тIаьхьо изоляторчохь хаавеллера иза. Цуьнан хӀусамехь полицин белхалоша а, нохчийн "Запад-Ахмат" эскархоша а талламаш бира. Цара дийцарехь, талламаш беш карийна ШолгӀачу тӀамехь хилла граната а, кхин йолчу лоьлхуьйтурш а. Талламаш беш цигахь хиллачу Демиденкон дегIа тIаьхь йиттина лараш гуш йара. ТӀаьхьо Демиденкос мукӀарло дира, шен бешахь карийнера граната, амма полици дӀайала хан ца хиллера шен аьлла.
