ТIекхочийла долу линкаш

Иллиалархо Темирсултанов Зелимха, Арамис цIарца а вевза иза, Нохчийчуьра Москох дIавахана ши бутт сов хан ю. Оьрсийчоьнан федералан телеканалехь хиллачу къовсамехь гIараваьллачул тIаьхьа, цо ехха хан яьккхира Нохчийчохь.

Делахь а кхузахь цуьнан кхоллараллин ма-хетта мах ца хетта, хIинца Москох вахана иза. Темирсултановна аьттонаш алсам хета цигахь. Цуьнца телефонан зIенехула къамел дира ас.

"Кхуза схьавеана ши бутт хир бу. ХIара ду аьлла гучудаьлла хIума-м дац. Амма гIала йоккха ю. Кхоллараллехь цкъа а бевзар буй теша аьлла нах а бевзина суна. Цхьа кхоллараллин цхьаьнатохараллица цхьаьна а кхетта, болх беш ву со. КестолгIа альбом араяла мега сан. Бахьанаш ду-кх, бахьанаш", - аьлладолийра ццо шен къамел.

Москох баьккхинчу шина баттахь бархI концерт елла цо цигахь. Дика тIеоьцу ша боху, амма ша уьш санна, хьовсархоша а, ладогIархоша а ша а зуьйш ву, элира цо.

Москох публика чIогIа коча ю, цунна дуккха а похIма долу артисташ гина, цундела даима а лаккхарчу тIегIанехь ша латто веза, ткъа нохчо хилча-м хIетте а, аьлла хета Арамисана.

"Гитарица схьавеъча, хьоьгахь цхьа йоккха шаьлта йолуш санна хета. Амма ахь сцени тIера цхьаъ-шиъ (илли) аьлча, хийцало (ойла), хьо баккъалла а похмIа долуш стаг ву олу. Схьахетарехь, иза ду-кх коьртаниг. Кавказера хьо веана а хилча, мукъам дика беш а хилча - иза дукха маьIне. ЦIахь дерг - цIахь ду. ЦIахь хаза а ду. Амма мукъамаш Москохахь бу», - бохуш вара иза.

Федералан телеканалехь «Коьрта сцена» олу къовсам чекхбаьлча, цуьнга контракт кховдийна хиллера продюсеро Матвиенко Игора. Массо а реза хиллера, Темирсултанов виссалц. Ша контрактана кIелла куьг яздича, шена коча уллуш дашо муш бу, шена иза ца лаьа, элира цо хIетахь.

Тахана а изза дог-ойла ю шен, вала а волуш, контрактаца болх ца бо, делла нохчочун дош кхочуш дийр ду ша, элира цо: "Мукъамехь, меллаша дIагIерташ ву со. Цхьацца контракташ кховда-м йо соьга, амма ас дукха хьалха дуьйна дош деллера айса-сайна, цхьаьнца а контракт язйир яц аьлла. Деллачу даша тIехь хир ду ша дерриге а аьлла. Кхузахь, бакъду, чекхвала атта дац иштта.

Беламе а ду, амма регги олу нохчо а ма ду беламе! Беламе ду бохург - цкъа а хир дац бохург ма дац! Ас дош делла, цу тIехь юкъаметтигаш латтор ю. Ас цхьаьнца а, шинца а контракт ца хIоттийна аьлла, соьца ларам алсам бу. Со сайн дешан да ву, сан самукъа долуш бу хIара болх".

Темирсултанов Зелимха Къилбаседа Кавказехь цхьаъ бен вац регги алархо. Кавказхошна керла и агIо елахь а, оцу артисто ша-тайпа иза ладогIархошна дIакхачоро нохчийн Боб Марли олу цуьнах цхьаболчара.

Шуна хетарг

Гайта комментареш

XS
SM
MD
LG