Интернетехь таллам бича гуш ду уггаре а кIезиг шансон ладугIучу меттигашна юкъахь Нохчийчоь а, ГIалгIайн мохк а, Дагестан а хилар.
И хьал иштта дуй аьлла, хаттар делира ас музыканте, "Орга" ансамблан декъашхочуьнга Дежиев Асланбеке. Цо дийцарехь, шансон езаш а, цуьнга ладугIуш а кIезиг нах бац Нохчийчохь.
Дежиев: «Шансон тахана чIогIа ладугIуш ю-кх вайн цIахь. Телехьожийлехь кIезиг ю иза, амма радиохь ю. Цхьа кIорге йолуш эшарш а яц уьш. Дахарах а, ненах а ойла йойтуш-м хуьлу уьш, амма дукхачу хьолехь и эшарш иштта ю олийла дац».
Нохчийн артисташа коьртачу декъана лоькхурш шансон олу эшарш ю аьлла хета Дежиев Асланбекан.
Дежиев: «Тахана нохчийн эшарех хьалхалера вайн шира иллешка ладугIу ас. Сулейманов Баудди масала. Ахмадова Хьава а, Токкаев Сулейман а, Дадашева Тамара а. Ахмадова Хьавас локхурш-м билггала шансон ю ала мегар ду».
Музыканто Дежиевс халахетарца билгалдоккху тIаьхьарчу хенахь музыка магийна яц, пондар а, кхиболу гIирс а хьарам бу бохуш, кегирхошна коьрта чу дуьллуш хилар. Оцу бахьанца дуккха а нах къехка элира цо.
Дежиев: «Мегаш дац, мегаш ду бохуш, чIогIа дийцаре даьккхина ду културица доьзнарг. Вайна юкъахь чIогIа айдина ду иза. Хьалха-м мага а мегаш схьадеана дара иза, ткъа хIинца галдаьлла-кх».
Шансонан кеп йолу эшарш французийн къоман културера ю. Оьрсийчохь галдаьккхина цуьнан маьIна, шансон набахтерчу тутмакхашкахь бен йоцуш санна. Ткъа нохчийн бакъйолу шансон лара мегар ду-кх, масала, Сулейманов Бауддис дIаолуш хилла «Анзоран ва Зазу» санна долу иллеш а.