ТIекхочийла долу линкаш

ЦIеххьана кхаьчна хаам!

Закир Магомедов

Шаройн лаьмнашкарчу Кенхира пхи вахархо лаьцна низамхоша. Цара наркотикаш лелийна боху. Цигарчу бахархоша "Кавказ.Реалиига" дийцарехь, 30-тех стаг ву полицино зуьйш.

Кенхи Iедал дахначу пIераскан буса кхечира. 3.00 гергга хан яра кхо вахархо, лаьцна, юьртарчу школин спортзале вигича. ТIевалийра царна Iуьйранна кхин а шиъ.

«Аьшпаш ду, лецначех цхьа а вац наркотикца гIуллакх долуш, иза иштта дIа тхуна тIейожийна «рагI» ю, хIоккхул наркоман лаьцна ала. И санна рейдаш массанхьа а йо. Иштта гойту полицино ша «наркоманица къийсалуш юйла», - элира тхоьца къамел динчех цхьамма.

Цо дийцарехь, полисхой юьртахула чекхбовлуш, нахана гина цаьргахь Кенхерчу бахархойн 30-тех цIе тIехь йолу кехаташ. Лецначаьрга, кхерамаш а туьйсуш, даредойту шаьш наркоманаш хилар.

"Кавказ.Реалиица" къамел динчу кхоалгIачо, лецнарш оршот тIедаллац кхобур бу спортзалехь, царна неIалташ бохуьйтур ду юьртахошка, гулам а бина, элира.

«Оршоьтадийнахь гулам бу хир болуш. Цига муфтиятан векалш а богIур бу. Лецнарш балор бу гуламхошна тIе. Цара шайна бехк тIеоьцур бу, нахе къинтIера довла а бохур ду. Ткъа церан гергарчара шайна къинхетамбар доьхур ду Кадыров Рамзане. Иза евзаш сценари ма ю!» - бохура кенхичо.

"Кавказ.Реалии" Шаройн полице кхача гIоьртира зIенехула – эрна хилира, схьа ца ийцира телефон цхьаммо а.

Кенхи гIараелира ерриг а Оьрсийчохь цигара Джалалдинов Рамазан баханехь. Иза стохка гIоьртира, Путине видео а яхьийтина, шайн юьртан кIоьлла цунна дIагайта, гIо деха.

ГIо юьртанна мелла а дира, боьхна некъ тобеш, хица, цхьаболучийн хIусамийн тхевнаш тобарца. Амма Джалалдинов шен цIера вада декхаре вира, са Iалашдеш, дагийра цуьнан цIенош.

Юха, телевидене а вигина, Кадыровга шена къинтIеравалахьара бахийтира. ТIаьхьо, полицин министран гIовсца Алаудинов Аптица цхьаьнакхетча, ведира Нохчийчуьра а.

Мотт ца тохарна таIзар дан оьшу аьлла хетий шуна?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG