Ши кIира ца кхоччуш хьалха, Соьлж-гIали юккъехь пикете арабевллачу бераш дайначу наношца цхьаьнакхетар дIадаьхьира меттигерачу Iедалан дайша, хьалха ваьлла республикан куьйгалхо Кадыров Рамзан а волуш. Оцу цхьаьнакхетаре сатесна бара и зударий. Амма республикан куьйгалхочуьнга а ца даладелла церан хаттаршна жоьпаш. Цул тIаьхьа оцу зударшна кхин хIума дуьсура, Оьрсийчоьнан президенте Путин Владимире кхайкхам банний бен. И гIулч яьккхаран бахьанех лаьцна дийцира бераш дайначу наношна хьалхаяьллачу Межидова Зайнапа.
Межидова Зайнап: "Бераш дайна наной лела дуккха а хан ю. Уьш леш а бу. "Хьо харжа а хаьржинера оха. Ахь гIо дийр ду аьлла хеташ а ду тхо", - аьлла ду оха цуьнга бичну кхайкхмна Iтехь. Маситтаза яздина оха цуьнга. ХIинца президент иза хаьржинчул тIаьхьа дуьххьара яздо.
Маршо радио: Шуна шайна хIун бахьанаш ду аьлла хета, ишшта байна болу нах, мича бахана аьлла таллам ца барна?
Межидова Зайнап: "Рамзанан карахь иза делахьара, цо тоххара уьш схьалехна хир бара. Тхан цуьнца хиллачу цхьаьнакхетарехь, цо элира, и доцург, шега мьулха а гIуллакх чекхадаккхалур ду, аьлла. Шен карахь иза доцийла хаийтира цо. Шадерриг Путинан карахь ду. ДIадигина бераш ма ду уьш, «мочить в сортире» а бохуш".
Маршо радио: Пикет дIаяьлча хиллачу цхьаьнакхетарехь аш дийцира-кх, нохчийн цхьацца метигашкахь чохь бахкош бу, аьлла...
Межидова Зайнап: "ХIирийн махкхахь бу уьш чохь бахкош. Суна сайна хаьа, кхаа гIаларчу набахтешкахь уьш латтош буйла, хIоранне ноьмарш а елла. 243 стаг цхьана набахтехь бу. Итт набахти ю иза. Ас хIинца билггал мичахь ю алахь, цигахь хIуъа а дан тарло. 12 шо долуш вайна, 16 шарахь лехна кIант цIавалийнера оха. Иза а, цуьнан нана а тешаш бу".
Межидова Зайнапа шаьш цIавалийна бохург ву Индербаев Iела. Хьалхара тIом болабелча дуьйна цIера вайна волу иза стохка бен ца карийра цуьнан нанна. Иза генахь а ца хиллера - ГIебарта-Балкхаройн махкахь, коьртаца цамгар йолучийн дарбан цIийнехь. Оцу 16 шарахь кхечу цIарца, ша мила ву а ца хууш, цу чохь ваьллина иза. Тахана шен вайна я дIавигина волу кIант я йоI лоьхучу нохчийн нанойх хIоранна а луур дара шайн лехарш ишшта дерзийта. Амма царах билггал хIун хилла хиъча а тоам бийр болчу хьолехь бу и зударий.