ТIекхочийла долу линкаш

ЦIеххьана кхаьчна хаам!

Европан Барт: «Новая Газета» уггаре чIогIачу кхерамна кIел лаьтта


Нохчийчуьра гомосексуалисташ ца хьийзабайта хIоттийначу гуламна дуьхьалоян арабевлла Кремлехьа болу бахархой, Петарбух, Охан-Бутт, 2017.
Нохчийчуьра гомосексуалисташ ца хьийзабайта хIоттийначу гуламна дуьхьалоян арабевлла Кремлехьа болу бахархой, Петарбух, Охан-Бутт, 2017.

Уггаре боккха кхерам шена тIехь лаьттачу зорбан гIирсийн могIара хIоттийна «Новая Газета» Европан Берто. Газетанна тIехь лаккхарчу тIегIан кхерам латтарх Европан Берто дина дIахьедар цуьнан пресс-гIоьнчалло кхачийна Оьрсийчуьрчу «Интерфакс» агенталле.

Нохчийчуьрчу Iедалан а, динан а урхалхоша кхерамаш туьйсу хаамийн гIирсерчу журналистийн дахарна, аьлла ду дIахьедар.

«Новая Газетана» лаккхара кхерам тIебоссарх лаьцна хаамбина «Журналисташ Iалашбаран а, церан кхерамзаллин а Платформано», иштта «Журналисташ Iалашбаран Комитето а», билгалдоккху ЕвроБерто.

«Журналисташ Iалашбаран а, церан кхерамзаллин а Платформа» - иза 2014-чу шарахь Европан Берто а, прессин кхерамзалла тергонехь латточу Iедалхйоцчу юкъараллаша а кхоьллина проект ю. Европан Берто онлайнехь зуьй журналисташна тIехIоьттинчу кхерамах лаьцна партнерашкара кхочу информаци, тергалйо оцу хьокъехь Iедалша ен реакци.

30-за хаамбина ЕвроБерто Оьрсийчуьрчу журналисташна тIехIуьттучу кхерамех лаьцна. Амма ЕвроБертан векалша дийцарехь, оцу пачхьалкхан Iедало цкъа а ца делла дуьхьал жоп. Массарел дукха – 84-зза – орцадаьккхина ЕвроБерто Туркойчуьрчу журналистийн хьокъехь, шолгIачу меттехь ю Оьрсийчоь.

Хьалхо «Новая Газето», Нохчийчохь 100 гергга стаг лаьцна гомосексуалист ву аьлла, шен агIонтIехь хаамбира. Бохура, вийна лаххара а кхо стаг.

Газетан адвокато Сабинин Андрейс даржийра деношкахь прессехула, «Новая Газета» Талламан комитете Нохчийчуьра гомосексуалисташ кхерамехь хилар кхелехула таллийта гIерта, аьлла.

Шен рогIехь Оьрсийчоьнан президентан пресс-гIоьнчас Песков Дмитрийс хаамбира, дахна кIира довш Кремле «Новая Газетан» коьртачу редакторера Муратов Дмитрийгара кехат деана, Нохчийчуьра шайна кхерамаш туьйсу, аьлла. Кремл дуьхьал ю оцу кепехь бечу тIеIаткъамна, бохура Песковс.

Нохчийчоьнан куьйгалхочун пресс-гIоьнчас Керимов Iаьлвис харцдира газето даржийнарг, «республикехь банне а боцурш дац я лоьцийла а, я хьийзабоцла а», аьлла.

XS
SM
MD
LG