ТIекхочийла долу линкаш

ЦIеххьана кхаьчна хаам!
please wait

No media source currently available

0:00 0:05:44 0:00
Линкана тIе

Исс накъост Шема ваха кечамаш беш хилла, оцу Iалашонца цхьаболучара герз IаIош а кечдина шайна, аьлла, жоьпе балийна уьш.

Кхел йолаелла ЧIуьлга-Юьртахь иттех де хьалха

Оьрсийчоьнан бехктакхаман кодексан 30-чуй, 208-чуй, 222-чуй артиклшца (зулам дан гIортар; низамехь йоцу тIемалойн тоба кхоллар; низамехь а доцуш герз эцар).

Кхеле балийнарш:

Алимханов Аслан, вина 1995 ш., Соьлж-ГIалара ву, дешна Ростовхь юридикан институтехь.

Асхабов Джамбулат, вина 1995 ш., Бена-Юьртара ву, дешна Ростовхь юридикан институтехь.

Алиев Шемал, вина 1994 ш., ЧIуьлга-Юьртара ву.

Дачаев Iиса, вина 1996 ш., Iалхан-Калара ву, дешна Ростовхь юридикан институтехь.

Гайрбеков Хьусайн, вина 1986 ш., Бена-Юьртара ву.

Гайрбеков СаIид, вина 1985 ш., Бена-Юьртара ву.

Саралиев Ислам, вина 1994 ш., Соьлж-Г1алара ву.

Китаев Мохьмад, вина 1984 ш., Бена-Юьртара ву.

Юсупов Артур, вина 1995 ш., ЧIуьлга-Юьртара ву, дешна Ростовхь юридикан институтехь.

Леца болийна кегийнах 2017 шеран Чиллан-беттан 8-чу дийнахь, массех дийнахь лецна тIаьхьий-хьалхий. Дуьхьал бехктакхаман дов айдина ялх де даьлча, Чиллан-беттан 14-чу дийнахь.

Кхел йолийна бахначу беттан 19-чохь. ТIаьххьара ладегIарш дIадаьхьна кху беттан 3-чу дийнахь.

Бехкевечу иссаммо а шаьш данне а бехке дац, аьлла. И дIахьедар цара дарца, Чернокозово, юханехьа, кхоббуче дIабигина уьш.

РогIера ладегIарш хир ду итт де даьлча - Марсхьокху-беттан 24-чу дийнахь.

Теркйистан полицин декъан талламча Саидовс А.В. ву бехктакхаман фабула кечйинарг - теллинарг, тIебаьхьна бехк тIечIагIбинарг ву оцу декъан куьйгалхо Шахмаев С-М.И.

ХIун даьлла боху талламо бехкебечаьргара?

Талламо хIара 9 а, кхин цхьаъ а, Дзукаев Ислам (иза тешийн могIара язвина, шаваьккхина левеш, лаьцна, Ростов дIавигина боху, амма кегийнехан адвокаташ ца теша цунах, толлуш бу цунах дерг) бехкебо уьш 1915-чу шеран юьххьехь дуьйна, Шема ДАIИШ-ан могIаршка а кхаьчна, Асадан Iедална дуьхьал тIемаш бан бохкуш хиларна.

ТIебаьхьначу бехкан чулацам

Дзукаев Ислама «Телеграмехула» 2015-чу шеран хьалхарчу деношкахь зIе тесна Шемахь тIемаш бечу Ульбиев Жабраилца, тIаме ваха сацам а бина, цуьнгара схьаэцна Шема дIакхачархьама некъах йолу информаци.

Юха Дзукаевца маситтаза а, шаьш шайлахь а, вовшахбеттабелла тIаме бахар къастош массо а кхелебалийнарш. Уьш юкъахь кечлуш хилла, Москох а бахана, цигара кеманца Туркойчу а, кхидIа Шема а некъбан.

…Амма «ца кхиина леринарг кхочушдан», « церан зуламе Iалашо 2017 шеран Чиллан-беттан 8-чу дийнахь хадийна уьш Оьрсийчоьнан Нохчийчуьрчу Теркйистан чоьхьарчу гIуллакхийн министраллан декъе балийначу белхахоша», боху тIебаьхьначу бехкан кехаташа.

Оццу талламо бахарехь, 2015-чу шеран бIаьста Дзукаевс, ша шен декъа тIехь цIено дуттуш, мехах белхаш бан лаьцна а хилла, масала, Гайрбеков СаIид. Цигахь къамелашца кечвеш хилла иза а , кхиберш а Дзукаевс Шема бига.

Герз а даьккхина веангара, чIагIдо талламо

Шаьш лоцуш, Чиллан-беттан 13-чу дийнан сарахь Гайрбеков СаIидан дегIах хьаьвсинчу полисхошна карийна, боху талламо, Ф-1 граната. Иза, цо дийцарехь, цунна Асхабов Джамбулата елла хилла.

Иштта, Дзукаев Ислама яла а елла, Асхабовс кхечу шен накъостех кхаанна дIасаекъна 3 тапча, граната Гайрбеков СаIидна кхаьчна, яздо бехктакхаман кехаташкахь талламчас.

Кхеле валийначу Гайрбеков СаIидан вашас Сулимана иштта дийцира Маршо Радиога шена а, шен вешина а талламчаша Шема баха гIиртинчийн хьалханча ву боху Дзукаев муха вевзира.

Гайрбеков: «Дзукаев Ислам тхуна тIевеара стохка, тхо цIенош дуттуш дара, шена оха цIенош дуттур дарий, аьлла. Тхо нахана цIенош деш, рогIехь, схьадогIуш дара. Реза а хилла, цунна цIенош доьттина оха.

Ахча хенахь схьа ца луш а лийлира. Москох воьдуш-вогIуш вара иза. Наггахь, тIевогIий, вист а хуьлура. Юха, ша а витахьара тхан белхан тобанна юкъа, ша хала воллура цо а аьлла, гIодархо схьаийцира оха иза. ТIаьхьо Москох вахара иза. Цул тIаьхьа тхоьца хIара гIурт нисбелира. Иза а лаьцна ву боху. Иштта дара-кх хилларг».

Прокуратуро а, Талламан комитетан декъо кхеле валийначу шинна дуьхьал тоьшаллаш дина кегийн нах бех-бехачу ярташкарчу 18 стаго.

Маршо Радионан къамел хилла бехкебечийн адвокаташца. Цара бечу хаамца, ЧIуьлга-Юьртахь кхелехь, цуьнан юххьанцарчу ладегIаршкахь, иссаннах цхьаммо а ца эцна бехк тIе.

Кхел хьош ю Дадова Раиса.

Ала догIу, низамца дац таллам боьдуш лецначарна шайн-шайна адвокаташ цакхачор, ткъа кхел йолаяллалц иссанна а тIехIоттийна ца хилла цхьа адвокат бен – Дажикаев Руслан (иза девна юкъараваккхийтина).

Маршо Радионо тергонехь латтадо Теркйистера иссанна дов. Хаамаш бийр бу кхелан рогIерчу гIулчех лаьцна.

Нохчийчохь Исламан банк схьаеллар муха хета шуна?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG