Нохчийчоьнан куьйгалхочо Кадыров Рамзана дIахьедина, маьждиге ца лелачу республикан бахархоша шайн еха маж дIаяккха еза. И аьлла цо республикан урхаллица хиллачу рогIерчу кхеташонехь.
"Кхин цхьа мода яьржина вайна, газан санна еха маж лелош. Делан дуьхьа лелош яц цара иза – иза Делан дуьхьа лелош верг маьждиге лела веза, ресторанашкахула кхерста хан хила ца еза цуьнан, Iибадан дан деза цо. Зуькаршка, маьждиге леларг – тхо кхета. Церан маж мел еха хилча а тхуна иза новкъа яц. Диснарг вайн гушдерг политикана дуьхьа деш ду, кеп хIиттош", - дIахьедина Нохчийчоьнан куьйгалхочо.
Политико бахарехь, "гай, букъ гуш йолу майкаш йоьхна" божарша "йоца, тIехь дола деш маж лело еза".
- Оцу кхеташонехь Кадыров Рамзана меттигерчу хьаькамашкара бехкаш даьхна балхаца доьзна доцчу гIуллакхе шаьш боьлхуш а цара шайн хадархойх тIехсов пайдаэцарна. Цунах лаьцна цо дIахьедина тIаьххьара мехкан урхалхошца хиллачу кхеташонехь. "Нагахь санна, республикехь оццул хадархой лелон шу декхаре делахь, шу дерриш а оьшуш ма ца хуьлу тIаккха",- аьлла Креспубликан куьйгалхочо.
- Каспийскерчу вахархочо дийцина бакъоларъярхошка, ша бух боцучу бахьнаца полице кхайкхинера, хеттарш дира, сурт даьккхира, профилактикан чоьте а хIоттийнера "экстремист" категорехула, аьлла. Иза лелоран бахьна, полицин белхахоша бахарехь, цуьнан еха маж а, Махачкалара "Тангъим" маьждиге вахар а дара.
- Узбекхойн иллиалархочо San Jay-с президенте Мирзиёев Шавкате яздира: цо бахарехь, маж хиларна концерташ ца хIиттайойту цуьнга. "Конституцехь яздина дац, Узбекистанерчу вахархочо маж лело мегаш дац, аьлла", - латкъам бина йишлакхархочо, цуьнан баккъала йолу цIе Джавбердиев Санжар ю.
