Деркач Анвар
Словакино Оьрсийчоьне дIавеллачу Яндиев Асланна гIелоярна кхоьру бакъоларъярхой
Братислава реза ца хилла Цхьанакхеттачу Къаьмнийн организацин мухьажирашкахула йолчу кхеташоно гIалгIа Яндиев Аслан Оьрсийчоьнан каравала мегар дац аьлла бина сацам кхочушбан. Бакъоларъярхоша бахарехь, боцу бехк бу цунна тIехьерчош.
Цхьанакхеттачу Къаьмнийн организацин кхеташоно Яндиевна экстрадици ян дихкира бутт хьалха. Словакера адвокат Опетт Лукас вара цунна сагатдийриг. Юьхьанца мехкан юстицин министралла реза хилира Кхеташонан сацам кхочушбан, амма тIаьхьо хийцаелира цуьнан ойла.
СагIадаран "Vayfond" юкъаралло (Швеци) шолгIа адвокат а лецира Яндиевна. Амма аьтто ца белира стаг кIелхьараваккха. Оьрсийчуьрчу а, Европерчу а бакъоларъярхойн, юристийн, журналистийн дехаршка ла ца доьгIна Братиславерчу Iедало – тоьшаллаш дац Яндиев зуламхо хилар гойтуш, Оьрсийчоьно боцу бехк тIекхоьллина цунна бахарх ца хилла гIуллакх.
Муха вина Яндиевх "террорист"
Къилбаседа ХIирийчу йогIучу Пригородный кIоштахь ваьхна шен доьзалца зоотехник Яндиев Аслан. Цигарчу полицино 2006-чу шарахь ша набахте кхачийначу кхаа гIалгIачо динчу зуламан декъахь ву боху иза.
Буьйцурш бу террорхой бу аьлла, ехха хенаш а тоьхна маршонах баьхна нах – Хадзиев Iумар, Оздоев Iалихан, Цуров Рустам. Яндиев Асланан вашас Тимура дийцарехь, оцу кхаамма шайн кхел йоьдучу муьрехь дIахьедина, шайгара етташ даьхна дареш, шаьш гIело кхин лан а ца елла, ехира хIуманна а бехке воцчу шиннан цIерш, аьлла – Несарарчу Гасаев Мурадан а, Яндиев Асланан а. Оцу кхаамма Европан кхеле а хьажийна шайна гIелоярх лаьцна арз. Иштта "вина" Яндиевх зуламхо.
Бер долуш дуьйна а виллина цомгуш ву иза, лоьрашна тIелелийна даима а. Я цхьанхьа а тIом бина а вац", - элира "Кавказ.Реалиига" Яндиев Тимура.
Кхаа ХIирийчуьрчу гIалгIачо шайца зулам деш хилла аьлла хьахийна Гасаев а лаьцна, гIелонехь кхебира ницкъхоша, амма бехк тIе ца эцна цо шена – и бахьана долуш, даккха хIума а ца хилла, дIахецна. Iедалан карара воллушехь ведда, Францехь веха мухIажиран статусца.
"Мемориал", "Гражданское содействие" ("Юкъараллера гIо") ю Яндиевна орца дохуш. Цара бахарехь, Оьрсийчохь адамийн бакъонаш хьалхачул а дукха хьоьшу тахана, волуьйтур вац Яндиев бехках мукъа.
Официалера йоцчу информацино Яндиев Аслан шен доцчу кехаташца ваьлла боху махках. Цуьнан нанас дийцарехь, Словакехь массийттаза тховкъело ехна цо, иштта дехна гIо Швейцарига а, Белгига а. ТIаьххьара а низамхоша Словаке кхачийча, цигахь шен цIарца ехна тховкIело, амма лаьцна, 7 шарахь валлийна набахтехь.
Шозза Европан кхеле цунна экстрадици цаяйтар дехна адвокато Опетт Лукаса, шоззе а юхатоьхна дехар. Амма Цхьаьнакхеттачу Къаьмнийн организацин хьукмато ца магийна Словакина гIалгIа Оьрсийчоьне дIавала. Юхьанца юстицин министралла резахилла Яндиев махкахь сацо, амма юхаяьлла тIаьхьо шен сацамах.
"Vayfond" юкъараллан векална Садулаева Аминина хетарехь, политика юкъайоьлла Яндиевн гIуллакхна – Братиславехь кхушеран бIаьста Iедале баьхкинчу хьакамаша бина и карчам.
Даима а хуьлуш дерг
Яндиевн гIуллакх – кхидерш саннарг ду, боху Садулаевас. "Иштаниг нислуш хуьлу, къаьсттина Германехь. Тхоьга сов тIаьхьа кхаьчна долу Албаков Адаман экстрадицех дерг а ду иза. Оцу стагна дуьхьал харц тоьшаллаш даьхнийла гора юрист воцчунна а, немцойн Iедална а. Амма Германи тийшира Албаковна Оьрсийчоьно кхел нийсонца йийр ю бохучух.
"ЦIавигинчул тIаьхьа Албаковх хилларг хууш дац", - элира Садулаевас.
"Мемориало" а, "Гражданское содействиено" а дагалоьцу Яндиевца доьзна ша динчу дIахьедарехь Польшера 2015-чу шарахь Оьрсийчу юхахьажийна нохчо Жамалдаев Зоврбек. Москох кхаьчча тIепаза вайра иза, хилларг къайленехь дисина.
Яндиев, ФСБ-но яржийначу видеоно тоьшалла дарехь, дIакхачийна Москох. Цигара вуьгур ву Къилбаседа ХIирийчу.
"Талламаш бар а, кхел яр а, официало ца хаийтахь а, кхузахь хир ду, гарехь, " – элира "Кавказ.Реалиига" Яндиев Тимура. ГIарадевллачу девнашкахь дакъалаьцна волу адвокат Сабинин Андрей резахилла Асланан агIо лаца, цуьнан вашас хаамбарехь.
Сабининца къамелдира "Кавказ.Реалино". "Со цкъачунна девна юкъа воьлла вац, сайн клиент а ца гина суна, Талламан комитете сайгара белхан тоьшаллаш а ца кхачийна ас дIа. Коьртаниг – Яндиевс соьга низамо хьоьххучу кепехь гIо деха дац. Девнан хьокъехь журналисташца суна юкъарло лело бакъо а ю цо яла езаш", - билгалдаьккхира Сабинина.
Словакин юстицин министралло цомгуш волчу Яндиевна экстрадици ярца бина харжам ца богIу юстицига корматталло доьхучуьнца, аьлла даржийна цхьаболчу юристаша. Иштачех ву Кубанан университетехь профессор лаьттина, ткъа карарчу хенахь Украинехь тховкIело карийна веха Савва Михаил. Цунна хетарехь, "дуккха а мехкашкахь бу политикаца бозабелла хьаькамаш, Яндиев "басаевхо" ву боху Оьрсийчуьрчу хьостанаша, цхьаммо а даре дина дацахь а, Словакина иза тоьана".
Савва цецвуьйлу Словакино Цхьанакхеттачу Къаьмнийн организацин Кхеташонан сацамна дуьхьало ярх. Иза бакъоларъярхошна "тоьхна тIара ду, дуьхьало ца яхь, тешнабехкаш алсам а бевр болуш", - элира политолого.
