ТIекхочийла долу линкаш

ЦIеххьана кхаьчна хаам!

Эскарера дIа ца валийтина Нохчийчуьра контрактхо мобилизацих бахьана а дина


Соьлжа-ГIалахь эскархой, гайтаман сурт
Соьлжа-ГIалахь эскархой, гайтаман сурт

Оьрсийчоьнан тIеман ницкъийн могIарера дIавала аьтто ца хилла Нохчийчуьра контрактхочун. Цунна дуьхьало йина Соьлжа-ГIалин гарнизонан тIеман кхело, мобилизаци йоьдучу юкъанна армера дIавала йиш йац аьлла. Сацам тIеэцна дечкен-беттан 24-чохь, амма кхело шайн сайте биллина хаам хIинцца.

Административан гIуллакхан материалашкахь йаздарца, 2022-чу шеран аьхка кхаа шарна контракт йинера Арсанов Мовсара. Гезгамашин-беттан 9-чохь эскархойн декъан командиран цIарах рапорт чуделлера цо, "зерех чекх ца ваьлла" алий дIаваккха ша аьлла. Нохчийчоьнан вахархочо иштта хаийтинера, доьзал кхобург ша цхьаъ бен цахилар а - Украинехь валар нислахь, церан дола дан стаг цахилар а.

Эскархойн декъан векало кхелехь кхетийна, мобилизаци йоьдучу заманчохь контрактхо оцу буха тIехь дIаваккха йиш йац аьлла. Низамца а догIуш, арми юкъара вала мега тахана цхьа хан кхаьчнехь а, могушаллица доьзна а, набахтехь йаккха хан цунна тоьхнехь а аьлла.

Оьрсийчоьнан президентан пресс-секретаро Песков Дмитрийс дIахьедира, "цхьана декъана кхайкхийна мобилизацих" омра хIинца а лелаш ду, амма тIекхуьйкхийла дац цуьнца, "тIеман кхинйолу Iалашонаш" кхочушйойла ду аьлла.

  • Къилбан тIеман гонашкарчу гарнизонан кхелашка контрактхошкара искаш кхочу, цхьацца бахьанашца шаьш дIадаха бохуш – доьзалера бахьанаш тIера Украинаца тIом бан дуьхьал хиларна тIекхаччалц. Амма гезгамашин-беттан чакхенехь дуьйна кхелаша массарна а дуьхьалонаш йо, мобилизацих долчу президентан Путин Владимиран омрана тIе а тийжаш.
  • Къилбехь а, Къилбаседа Кавказехь масийтта меттиг хаабелла тIамехь дакъалаца контрактхой дуьхьабуьйлуш. Масала, ГIебарта-Балкхаройчуьра а, Къилбаседа ХIирийчуьра а Росгвардин эскархоша къаьсттина дукха рапорташ кхеле чуделла, Украинехь тIом бан дуьхьалдовларна шаьш гIуллакх дечуьра дIабахар къовсуш.
  • Украинана дуьхьал тIом боьдучу юкъанна командировке ваха дуьхьалваьлла Нохчийчуьра эскархо-контрактхо хилла Каимов Заур шен хьокъехь дина омра къовса гIоьртира. Делахь а Соьлжа-ГIалин гарнизонан тIеман кхело юхатоьтхна цуьнан иск.
  • Дагестанерчу Буйнакскехь куп тоьхна хиллачу 136-чу бригадин 300 эскархо Украинана дуьхьал тIом болийна бутт баьллачул тIаьхьа дуьхьал хилира Украинехь тIом бан. Пачхьалкхан дозана тIера шайн лаамехь арабевллера уьш.

Оха хьоьхург

XS
SM
MD
LG