Шен накъостаца цхьаьна эскархойн дозана тIе вала дагахь хилла Нохчийчуьра вахархо герз тоьхна вийна Ростовн кIоштара Новороссийскехь. 25 шо долу А.Адоли кхелхина некхах йинчу чевнах, йаздо Baza телеграм-канало.
Вийначун накъост лаьцна, хаамбина пачхьалкхан ТАСС агенталло, Къилбан гонашкара тIеман министраллин пресс-гIуллакххошна тIетевжина. "Зуламхо бакъоларйаран органийн кара дIавелла, ларйечу гIишлонан дозана тIе хIун Iалашо йолуш вала дагахь хиллера къастон", - аьлла агенталлица къамел дично. ГIаролехь волчо герз тоьхна хилла царна тIе.
Baza-н хаамца, Б.Муса ву лаьцнарг – цу шингахь герз ца хиллера. ШолгIаниг мел хан йолуш ву а, эскархойн декъе стенна вала лаам хиллера а, хаийтина дац.
- Чиллин-баттахь Буьри-ГIаларчу тIеман гарнизонан кхело йалх баттана дисциплинаран таIзар дира, шен лаамехь эскархочун гIуллакх дечуьра дIавахначу контрактхочунна. Украинерчу тIамехь дакъа а лаьцна, йухавеана вара иза.
- Дечкен-баттахь Къилба ХIирийчоь аьлла, шаьш дIакхайкхийначу махкара кхело 5% цуьнан алапа дийнна шарахь пачхьалкхана а дерзош, таIзар дира контрактхочунна. Ша эскаран гIуллакх ден дакъа дIатеснера цо 17 денна, Украинерчу тIамехь ша хиларца дара и аьлла, бахьана а далош.
- Шайн лаамехь декъера дIабахарна дечкен-баттахь Нальчикехь кхел йира тIекхайкхина хиллачу Мальсагов Тарханна (шой, кхо буттий чохь баккха) а, Саутиев Iумарна (шо колонихь).
