Европерчу адамийн бакъонийн кхеле дуьззина арз дIахьажийна "Iазапашна дуьхьалояран Комитето", полисхочунна тIелеттера аьлла, бехкейина Соьлжа-ГIаларчу СИЗО-хь латточу бакъоларъярхочун Янгулбаев Абубакаран ненан Мусаева Заремин гIуллакхехула.
Мусаеван гIуллакхехь Европан Конвенцин дахаран бакъонан а, коьртачу маршонан а, бакъонаш ларъяран а бархI къепе йохийна аьлла хета бакъоларъярхошна, хIунда аьлча, инсулинах йоьзна, диабетца йолу Мусаева бертаза Соьлжа-ГIала дIаюьгучу заманчохь яларан кхерамна бухахь хилла иза.
Иштта бинчу латкъамехь билгалдаьхна ницкъбар дихкина хилар а, маршонан бакъо йохор а, стагана тIекховда йиш цахилар а, нийсонца кхел яр а лардина цахилар.
- Дечкен-беттан 20-чохь Нижний Новгородерчу бакъоларъярхочун Янгулбаев Абубакаран да-нана дехачу петаре чулилхинера Нохчийчуьрчу МВД-н белхахой, цара бертаза Соьлжа-ГIала дIайигира цуьнан нана Мусаева Зарема, теше санна хеттарш дан юьгу аьлла. Дуьххьара чохь даккха 15 дей-буьйсий туьйхира цунна, полисхо сийсазвина аьлла, тIаьхьо бехктакхаман гIуллакх диллира – протокол хIотточу полисхочунна тIелеттера аьлла.
- Мусаева Зарема лачкъийна ши кIира даьллачул тIаьхьа бен адвокат тIе ца витира цунна.
- ДIасаялар доьхкуш, кхело сацам бечу юкъанна кхетамчохь ца хиллера Мусаева.
- Хьалхо Европан адамийн бакъонашкахула йолчу кхело (ЕСПЧ) декхаре йира Оьрсийчоь хIора шина кIирнах Соьлжа-ГIалахь СИЗО чохь латточу Мусаева Заремин хьолах лаьцна хаамаш шайга кхачон. Кехаташца бух а балош, дийца дезар ду хIинца цунна дIакхачош долчу лоьрийн гIоьнах, яздинчу молханех, цуьнан хьоле хьовсарх лаьцна. И барам хIоттийна кхелан регламентан 39-чу низамна тIе а тевжаш, нагахь санна, оцу стеган дахарна кхерам болуш хIума делахь, маса гIуллакх луьстуш.
